سهر الليالى

نداء إلى أصحاب القلوب الرحيمه

2010-03-09T15:24:00.006+03:00

كتير بفكر وأقول لنفسى " هما ليه شركات البسكوت والعصير والحاجات الفانكى دى بيعملو فينا كدة..؟؟؟؟ "

يعنى هل يعقل أن واحدة محترمه فى طولى وفى سنى كدة راجعه من شغلها قرفانه وكل أملها ومنى عينها أنها تشترى باكو بسكوت تحلى بيه بعد الغدا تفضل طول ما هى ماشيه تفكر إزاى هتقول للراجل على البسكوت اللى هى عايزاه
أصله كان اسمه " هوبا " - اه والله هوبا - بسكوت حلو جدا ومحترم لكن ايه علاقته بأسمه متعرفش
وحبذا بقى لو الراجل اللى أنت داخل تسأل عنده مجالوش البسكوت ده قبل كدة
وكااااااان المشهد
داخله طبعا وراسمه إبتسامه بلهاء لأنى مش عارفة إزاى حسأل وخصوصا إن أوبشن إنى أدخل أدور بنفسى مش موجود
وبصوت يكاد يكون القطر دايس عليه لدرجه أن الراجل مسمعهوش أو كان بيستعبط معرفش قمت قايلاله

" لو سمحت فى بسكوت هوبا "

أرتسم على وجه الراجل أبتسامه أكتر بلاهه من اللى كنت رسماها وأكيد أعتقد إنى واحده هبله وأبتدى يسوء الهبل هو كمان وقالى

" إيه...؟ "

قمت قايلاله

" هوبا "

قالى

" لا والله مجلناش ده "

دة غير واحد تانى بصلى وقعد يضحك وقالى

" لا مفيش "

يعنى هل فى تعمد واضح وصريح من الشركات دى لإذلالنا وإجبارنا على إستخدام أسماء عجيبه مكناش ممكن نفكر نقولها ولا أصلا هما مكانوش عاملين حسابنا فى خطة مبيعاتهم على أساس إن الحاجات دى بيشتريها الأطفال بس وهما مبتفرقش معاهم إنهم يدخلو يقولو

" عمو عمو فى بسكوت هوبا "

ناهيك طبعا عن أسماء كتير أفظع من هوبا ده واللى بيكون الحل فيها

" لو سمحت عايزة من ده "

بس ده لو سمحتلك الظروف أصلا وكان حظك حلو أنك تلاقيه قدامك ومتضطرش أنك تقف ساعه قدام الراجل متنح فى الحاجات اللى عنده وفى الأخر تقولو شكرا وتسيبه وتمشى طبعا فى حالة إنك متلاقيهوش بدل ما تسأله وتعرض نفسك للمزله

تخيل بقى مشهد تانى لواحده واقفه فى البلكونة بتنادى على الراجل اللى تحت بيتهم - قبل ما يبقى فى تليفون تكلمه يحطلك الحاجة فى السبت ابو حبل ده - بتقولو والنبى يا خويا عايزة 2 "صعيدى والدلع ديدى" وواحد "قلبظ" وواحد "ايزى موزووووو" يا لهوىىىىى بس طبعا هى معذورة

زمان مكنش فى الأسماء العجيبه دى كانت كلها أسماء محترمه كدة - ولا يمكن عشان كنا أحنا عيال برضو مش عارفه - لكن برضو كان فى

" بم بم وشيبسى وكاراتيه وبست ولوكس وجيلى كولا " أسماء عاديه كلها ولما إنحرفو بقى طلع "طأطأ وهشه وتوتوس"

طبعا أنا معنديش حل أقدمه للأسماء دى أو أقتراحات ممكن أقدمها عشان تبقى الأسماء أكتر لياقه لكن
بوجه نداء إلى أصحاب القلوب الرحميه من ذوات المصانع دى

" الأطفال مش هما بس اللى بيشتروا .....دة احنا معاهم "
" وسهلوها علينا ربنا يسهلها عليكو "

الأميرة والبستان

2010-01-16T18:01:00.017+03:00

كان ياما كان يا سعد يا إكرام
وما يحلى الكلام إلا بذكر النبى عليه الصلاة والسلام

فبمكان وزمان كان
كانت تسكن أميرة جميلة
تدعى أميرة الحكايا والأحلام

فما كان هناك أكثر من أحلامها ولا أمتع من حكيها
حيث كانت لها مخيلة كبيرة
نشأت من طبيعة جميلة
فكانت تسكن بقصر كبير
يطل على بحيرة صغيرة

وبيوم من ذات الأيام
وبينما هى سابحة بين الطبيعة والأشجار
والخضرة ذات الأنهار
إذا بها تفاجأت
بباب كبير
لبستان غريب
فلم يكن لذلك البستان وجود بالأمس القريب

أسرعت الأميرة
لتستكشف الحقيقة
فإذا برجل عجوز ينام
عند باب البستان

أقتربت منه على مهل
فأيقظتة دون قصد
وما أن أفاق الرجل
حتى أقبل عليها بأبتسامه

وقال : مرحبا ً أيتها الأميرة ذات الأحلام الجميله
قالت : وهل تعرفنى يا رجل
قال : نعم وأنا لك منتظر
قالت : فما قصتك وذلك البستان العجيب . أليس وجوده بجديد ؟؟
قال : لك بذلك البستان موعد وله حكايه وسأقصها عليك إن أردت للنهايه
قالت : نعم , وأنا كلى آذان لك صاغيه
قال : وجود البستان من قديم الزمان , لكن لا يلحظ وجوده إلا من آن له الآوان فلك بذلك البستان زهره وله عليك شروط للجوله
قالت : وكيف؟
قال : تأخذين تلك الزهريه , فتدخلين من باب البستان وحدك أو لو شئت ساعدتك , فبالبستان بين الزهور طريق , تمشين به حتى النهايه , تختارين ما تشائين لكنها واحدة فلا تنسين , لكن الطريق ليس به رجوع فما إن مشيت فقد تركت , حتى تجدى نفسك قد خرجت . فما بالك أيتها الأميرة ستدخلين أم سترحلين؟؟

وقفت الأميرة دقيقة فى فكر وحيرة

ثم قالت : وكيف لى أن اختار من كل ذلك البستان زهره أما ترى أنها قله!!
قال : الشرط هو الشرط ولك الحق فى القبول أو الرفض
قالت : حسنا فله الأمر من قبل ومن بعد , ولكن هل لى بمشورتك ؟
قال : نعم طبعا هى لك دون شك

دخلت الأميرة بصحبة الرجل العجوز
بعد أن أثار حكيه عن البستان فضولها وأحلامها
ورسمت زهرتها بخيالها

فأنبهرت الأميرة بالبستان
فهو ملىء بالزهر أشكال وألوان
ولكنها فى حيره
فمعها تلك الزهريه وتلك الشروط الغبيه

قالت : وما العمل الآن أيها العجوز .. واحدة فقط .. هل يجوز!! قل لى ماذا أفعل وبنصيحتك عنى لا تبخل
قال : حسنا .. أنظرى إلى تلك التى هناك

فلما نظرت إلى حيث أشار
فإذا بزهرة تسحر الأنظار

قال : أعتقد أنها زهرة جميله ولزهريتك ستكون غنيمه

وقفت الأميره فى لحظة صمت وحيره
نعم الزهرة جميله
وبزهريتها ستكون حقاً عظيمه
لكنها مازالت بأول البستان
وهو بالزهر ملئان
فماذا تفعل إن غدت للأمام
فوجدت أجمل من تلك أو مثلما تمنت بالأحلام

نظرت للرجل وقالت : دعنا لا نتعجل الأمر ولننتظر للأمام
قال : حسنا أيتها الأميره البستان كله تحت الأمر وأنا عند الباب إن شئت فى أى وقت ولكن لا تنسى الشرط وتأكدى حينما تجدينها أنه لن يكون قبلها ولا بعد
قالت : حسنا أيها الرجل الكريم وأنا لك من الشاكرين

غدت الأميرة تمشى بين الزهر
تلك جميلة وتلك أجمل
تلك مناسبة ولكن تلك ستكون لزهريتها أنسب
تنتقل من زهره إلى أخرى
دون أن تلتفت إلى أن الطريق ليس له رجعه
نظرت للوراء فإذا هى بالمنتصف
فقررت أن تختار واحده
قبل أن تخرج نادمه

إلى أن وجدت زهره
ظنت أنها قد تكون المنشوده
أقتربت وقد قررت أن تقطفها
فإذا بشوك يجرح يدها
فتألمت الأميرة كثيرا وأستغربت
لأنها بها أعجبت
وقالت أنها زهرتها أو هكذا ظنت

تضايقت الأميرة وأنزعجت
ولوهلة بجرحها أنشغلت
وصارت للأمام دون أن تتلفت
وفجأة أدركت الأميرة أن نهاية البستان قد قربت
وأن ما بقى من الزهر لم يعد جماله يبرق
وأن تلك الزهره التى أختارها لها صاحب البستان كانت هى الأجمل
فنظرت للوراء وأرادت أن لها ترجع
فتذكرت ما قاله البستانى عن ذلك الشرط
عندها أدركت أنها ما كانت لابد أن تضيعها
فلقد كانت حقا جميله

ولكنها وقتها طمعت
ونسيت أنها لو رضيت
حتى لو كانت قليله لكانت فى عينها كبرت

فأنفجرت الأميرة فى بكاء شديد
فما عادت تعلم ماذا تفعل بالتحديد
وأنها ولابد أنها ستندم
فالبستان أوشك على النهايه
وللوراء ما عادت هناك رجعه
فلابد وأنها خسرت

عندها ظهر البستانى من جديد

وقال : ماذا بك أيتها الجميله !! لا تبكى أيتها الأميرة فالبكاء لا يرجع ما فات
قالت وهى تبكى : وما عساى أفعل !!
قال : اسمعى من عجوز القليل فقد ينفعك وما تدرين
لا تبكى على ما فاتك فمن نظر خلفه أضاع خطوة قدمه , وما فاتك ما كان لك , وما لك ما كان ليكون لأحد سواك , فلا تندمى على ما فات , ولكن تعلمى وأنتبهى لما هو آت
قالت : وبرأيك ماذا أفعل الأن أيها العجوز الحكيم؟
قال : أنسى ما فات وأنظرى بأبتسامة إلى هناك

نظرت الأميرة بعد أن توقفت عن البكاء
وجففت دموعها واستمعت للكلام
فإذا بزهرة جميلة هى أجمل ما رأت فى ذلك البستان

قالت : وهل لى بتلك الزهره أيها العجوز الحكيم
قال : وماذا يمنع أيتها الجميله هى لك إن لم تكونى بغيرها ترغبين
قالت : لا هى أجمل من أن أنظر لغيرها

فطارت إليها
فأقطتفتها على مهل
فكانت لزهريتها كالأهل

وعندها
أستدارت وشكرت البستانى على كل شىء
وخرجت الأميره من البستان سعيده
بزهرتها الجميله
ورحلتها القصيره
التى تعلمت بها أشياء كثيره
فمنذ أن سمعت من البستانى عن قصه البستان والزهر
لم تكن تتخيل أنها ستحظى بمثل ما أخذت
فلم تستطع أحلامها أن ترسم هذا القدر
فليس كل ما نتمنى هو أجمل مما نحصل

وما أن خرجت الأميره من هناك حتى أختفى البستان
فأفاقت الأميرة من النوم على ذلك الصوت
ليخبرها أن الحلم قد تم
وأن هنالك قصة جديده لتحكيها اليوم
عن ما تعلمت بذلك البستان فى الحلم

وإلى لقاء جديد مع قصة جديدة من حكايا الأميرة
أميرة الحكايا والاحلام

أسطورة الخريف

2009-10-07T15:41:00.007+03:00

ويأتى خريف جديد

خريف من بعد خريف ولا شىء يتغير

فمازالت نسماته البارده تأتى محملة بذلك الشعور

نسمات ممزوجه برائحة الجوافه والبلح

تلك الرائحه التى ومنذ طفولتى تحمل علىّ غصة صغيره فى صدرى

لأنها كانت إذاناً بأن الصيف قد أنقضى وأن المدرسة أتية ولا مفر

فلم تكن المدرسه على أيامى مثلما هى لجيل هذا الزمان

فقد كانت تعنى الكثير من الهم والغم والأمتحانات وحبسه بين جدران البيت بحجة أن طبعا مينفعش نخرج عشان نذاكر وننجح

ولأن المدرسه كانت ست أيام من أصل سبعه والتى هى أيام الأسبوع

يعنى معندناش غير الجمعة واللى كان لازم يضيع فى إفترا الواجبات المدرسية ومنهم لله بقى

ومرت أيام المدرسه والجامعه وكل ما يتعلق بكلمة دراسه من قريب أو من بعيد

ولا أعلم لماذا مازالت تأتينى تلك الغصه كلما مرت بى نسمه باردة من نسمات الخريف الجميله بما تحمل من روائح الجوافه والبلح - واللى بحبهم والله ومعنديش أى ضغائن فى نفسى من ناحيتهم - والتى تخيلت أنها ولابد من أنها قد اختفت بانقضاء عهد الدراسه اللعين

هل لكونى كائن صيفى مولوده بمنتصف شهر أغسطس يعنى عز أغسطس وبمجىء الخريف يعنى أن أوانى قد نفذ

أم أنى إنسانه غريبة الأطوار يعنى الصيف لى كثيرا ً من المتعه والامل والانتظار

ولا أعلم ما صلة الارتباط بين الصيف وكل هؤلاء ولكن إحساسى بأن الصيف هياخد كل دول معاه وهو ماشى

أم لأن الصيف نهاره طويل وكله نور على عكس الشتاء فالخريف هو أول دلالات وصول الشتاء بيومه القصير ونهاره المظلم معظم الأوقات بما يبعث على النفس كأبه رهيبه

أم لأن الدنيا هى أيضا ً تحزن أن الصيف ماشى وهييجى الشتا اللى هيطلع عينها

تعددت الأسباب والإحباط واحد

فذلك هو الشعور الذى يأتينى مع الخريف

مع بعض اللذه والمتعة والأستمتاع بأجمل جو فى السنه

واللى معرفش بيجو إزاى بس هما بيجو وخلاص

خريف من بعده خريف

ومازالت

تلك هى أسطورة الخريف بالنسبة لى

لمسة الحب

2009-01-21T23:24:00.006+03:00

منذ أول لقاء بيننا
لفتت نظرى ضحكتها الساحرة

وإذا بصوتها يسكن أفكارى
منذ تلك اللحظة
والحوار مستمر
لقد فتحت عينيا على عالم جميل

بوابته الكلمات
كانت أحاديثنا تمد ساعات

تلونها الضحكات

ويتألق فى ثناياها الفرح

معها

كان كل شى يبدو مشرقاً

فهى كل ما كنت أتطلع إليه فى الدنيا

وهى

كانت

ومازالت

أجمل إمرأة رأيتها فى حياتى

عجباً وعجباً منه الحب

لا يعترف بمقاييس أو حدود
لا نعلم متى ولا كيف ولا من أين يأتينا

ولا نعلم لماذا هؤلاء تحديدا

نتسائل ونتسائل ولا نجد جوابا

إلا أننا نحبهم

وقلوبنا تدق لهم

ولا نريد إلا السعادة لهم ومعهم

فمعه يكون كل شىء جميل بطبيعته دون جهد منا او اصطناع

دون شروط أو قيود

فهو دفء يدب بالقلب فجأة فنشعر به وكأن سحر يداعب قلوبنا

حتى يختلط علينا الامر فلا نعرف هل ما سببه هو عقلنا أم قلبنا

لكنه شىء أكبر منهما الأثنين

فعندما نحب تختل معايير القلب والعقل معاً

فهو ليس إلا هبه من الخالق وحده

لا يعلم سرها إلا هو

فلنساله أن يغمر قلوبنا بذلك الدفء

ولنحمده عليه

فلا حياه لمن لاينبض قلبه بالحب

ــــــــــــــــــــــــــــــــــــــــــــــــــــــــــــــــــــــــــــــ

طول عمرى بكره لون الكأبة فى حياتى وبقاومة دايما بكل ما أوتيت من قوة لكن أوقات بنحتاج لحظات راحه من تلك المقاومة وبيكون ثمنها للأسف الأستسلام المؤقت لتلك الحاله لكن دايما كل اللى بيحصلنا بيكون خير لينا ففى كل محنه بنمر بيها منحه ودايما بعدها بنزيد شىء جميل

بعتذر لنفسى أولا ولمدونتى و لكل حد دخل عندى وكانت كلماتى نكد عليه وان شاء الله ميكونش فيه نكد اسود كدة تانى وبشكر أصدقائى اللى سألو عليا واللى دايما كانو بيتطمنو عليا وشجعونى عشان أرجع تانى

شكرا أحمد الصباغ - شكرا سوووو - شكرا لماضة - شكرا سيد سعد - شكرا مصطفى الأسكندرانى

شكرا لكل حد دخل سأل وكتب كومنت أو اى كلمة لان كل كلمة كانت ليها عندى قدر كبير

شكرا لمخلص أمين ورضوى شكرا لمروة السيد يا صديقة عمرى واللى فاجئتنى زيارتك وكلماتك وشجعتنى اوى

والحمد لله على كل اللى وصلتلو

أة وفى حاجة تانية بهنى شركة زين على إعلانها دة لأنو كان عاجبنى جدا فكرته

يلا بس خلاص

صعب .. صعب .. صعب

2008-07-13T00:49:00.007+03:00

أن يخطأ الإنسان هو فعل عادى
فكل ابن أدم خطاء إلا من رحم ربى وخير الخطائين التوابين
ولكن أن تخطىء خطأ فى حياتك يظل نصب عينيك لفترة طويلة من عمرك فذلك هو الشعور الصعب
يظل أمامك وكأنه يؤنبك وياله من ألم
هو قدرك وما كان ليخطأك .... نعم تعلم
ولكن أن تكون أنت سبباً فيه فذلك هو ما يؤلم
وليته كان ذنباً حتى تتوب عنه وإنما كان قراراً أتخذته أنت بملىء إرادتك ولا رجوع عنه أو إصلاحاً فيه
فمن يملك أن يعيد الزمن ومن يملك أن يخفف من ذلك الألم

...............

أن تشعر بألم يصرخ بداخلك ولا تقوى أن تفصح عنه فأنت تعلم أنه إن خرج سبب لك الألم أكثر وأكثر فلا يكون منك إلا أن تكتمه بداخلك مهما فعل ذلك الألم فيك

...............

أن تشعر أن بداخلك قيود لا تستطيع أن تمزقها

...............

أن تشعر أنه ليس لك طموح

...............

أن تشعر أنك محبط إحباط شديد لا تستطيع الخروج منه

...............

أن تشعر أنك تكره نفسك لما أنت عليه
...............

أن تشعر برغبه شديدة فى البكاء حتى تنفس عن ما بداخلك ولا تجد الخصوصية الكافيه لفعل ذلك فتتحجر دمعتك داخل حلقك حتى تكاد أن تخنقك
...............

أن يتملكك الحلم بما تحتاج حتى يمزقك الأحتياج ويصير كل ما تتمناه من الدنيا أن تجده بل وتبحث عنه فى كل ما حولك

ولا تجده

وكلما تخيلت أنك وجدته كان هو سبباً فى ألمك وجرحك

فتكره كل ما حلمت به وأحتجت إليه يوما لأنه كان نقطة ضعفك بعد أن كان كل ما تحب وترغب فى الدنيا

...............

أن يسألك أحدهم " ما بال حلمك ؟؟ " منتظرا جوابك

لأنه يعلم أن به تفائل الدنيا كما تعود منك

فلا يجد منك جواباً سوى

!!!!

عفواً فإنى أعتزلت الحلم
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

سامحونى بجد على لمحه الكأبة دى بس غصب عنى أول مرة يتملكنى الحزن بالشكل دة ومعرفش هخرج منو إزاى

الله أعلم

مكنتش عاوزة الكأبة تخيم على مدونتى بالشكل دة لأنى دة مش من طبعى ولا بحب كدة بس غصب عنى بجد حاولت بس مش عارفة

بجد بتأسف لكل حد زارنى ومازلت مقصرة معاه بعتزرلكو كلكو وبشكركو كلكو بجد على كل كلمة حد سبهالى وكل دعوة جميلة وصلتنى منكو

وبشكر كمان كل المدونين اللى شرفونا فى اسكندرية والمدونين اللى استضافونا أصلا وبجد أتشرفت وأتبسط بمعرفة كل حد قابلتو فى اليوم دة

فتقبلوا أعتذارى وشكرا لكم

شوق وحنين وفى اسكندرية منورين

2008-06-25T10:11:00.004+03:00

يااااااااااه وحشتونى أوى بجد

يييييي فى كلام كتير أوى أوى عايزة أقوله

بس أقلكو لا مش دلوقتى عشان فى خبر مهم أوى أوى

يوم الجمعه الجاية يعنى 27/6/2008 فى لقاء كبير للمدونين فى اسكندرية

اللى عرف يبلغ اللى لسه معرفش عشان أنا رايحه وهستناكو كلكو عشان عايزاكو تيجو كلكو

عاوزة أشوفكو كلكو كلكو

دة العنوان للى لسه معرفش

مركز الثقافة والحوار بالأسكندرية

رقم 345 ميامى 6 ش جمال عبدالناصر - عمارات التعمير - برج الأميرة - أعلى شركة الشرق للتأمينأمام أسواق الشريف - العصافرة / الإسكندرية

مع أنى مرحتش هناك قبل كدة بس تقريبا هو ميتوهش

بجد نفسى الناس كلها تيجى

عامة أنا إن شاء الله هرجع بس أدينى سايبة شبابيك المدونة مفتوحه بهويها من القفلة

واصبرو عليا عشان انا عاوزة أشكركو نفر نفر

يلا هستناكو

زورونا تجدو ما يسركم

شمس وهوا وبحر ووجه حسن

هههههههههه

إن شاء الله

Missing

2008-05-19T01:46:00.005+03:00

الصورة دى أخدتها للبحر عندنا فى اسكندرية من كام يوم فاتو

رائعة من روائع إبداع ربنا فى خلقه سبحانه أذهلتنى كالعادة

الصورة دى كانت تقريبا فى وقت الساعه ستة كدة يعنى مش مغرب ولا حاجة

لكن السما سبحان الله كانت مضلمة أوى لكن الشمس طالعه بنور عجيب مش متسللة لكن واضحة أوى فى نص البحر منورة صفحه المية اللى كانت شبه ناعمه إلا من حبة ريح مخروشين فى نعومتها شوية

المنظر بصراحه أذهلنى وأستفزنى أنى أقف وأصورة وكنت محتارة أصورة أزاى ومنين عشان أقدر أرسم فيه كل اللى أنا شايفاه وواصلنى فى لحظتها بس الحمد لله ربنا وفقنى وإلى حد كبير الصورة أعتقد طلعت كويسة وأرضتنى

الغريب إنى معرفش ليه حسيت أنو مشهد بيعبر عن حالتى شوية

.
ضوء مفروض يكون مضوى وساطع لكنو مش طالع أوى يمكن طالع حبة أو بيحاول يطلع بس طالع شكلو غريب بس هو عايز يطلع

فى سما مش عايزة أقول مضلمة لكن مغيمة حبة

بس البحر هادى جدا وبالعكس شكلو حلو كمان

مش عارفة أقول ايه

سامحونى إذا كنت غايبة ومقصرة معاكو ومع مدونتى بس يمكن مش متظبطة شوية وعندى حاله غريبة حبتين معرفش ليه

كأنها حاجة بعدانى عن أنى أكون هنا

تايهه يمكن وبدور على نفسى أو بدور على حاجة تريحنى بجد مش عارفة هى إيه أصلا

مفروض أكون مبسوطة كتير وعندى حماس خصوصا بعد الحاجات الحلوة اللى مرت دى لكن مش حصل

معرفش ممكن أوصل لفين وإزاى وأمتى

لكن كل اللى أقدر أقولو أن أنا بشكل عام كويسة الحمد لله بس دى كلها حاجات داخلية بس مأثرة عليا حبتين تلاتة كدة

أدعولى ربنا يهدينى ويهدينى للخير

وبجد بشكر كل حد زارنى ولسه بيزورنى وبعتذرلكو كتير أوى لأنى بحبكو كلكو أوى ووحشتونى جدا و وحشنى وجودى معاكو ومع مدونتى

أخبار خفيفة

2008-05-09T02:06:00.003+03:00

من تانى نروح على الإذاعه ونسمع كلام المدونين
زارونى أسرة البرنامج الإذاعى أنت تسأل والكمبيوتر يجيب مرة تانية وقالولى أن مدونتى ومدونة البنات عايزة ايه هيكونو ضيوف حلقات فى الأسبوع ده
والنهاردة الخميس 8 مايو كان ميعاد إذاعه الحلقة عن مدونة البنات عايزة ايه واللى ممكن تسمعو تسجيلها دلوقتى حالاً بالاً أهو من اللينك دة بعد ما تحملوه طبعا
http://rapidshare.com/files/113552341/Record000.amr.html

والحلقة كانت تحديدا عن بوست " لا تقل أحبك فحسب " وكانت جميلة وبشكر أسرة البرنامج على صياغه الحلقات بالشكل الجميل دة وبقول لصديقاتى البنات مبروك يا بنات ويارب دايما متجمعين ع الخير إن شاء الله .

إن شاء الله يوم السبت اللى جاى 10 مايو يعنى هيكون ميعاد إذاعه الحلقة عن البوست اللى فات فى مدونتى سهر الليالى واللى كان بعنوان تخاريف تكنولوجيه أيوة اللى تحت دة على طول أهو
أتمنى لو حد سمعو يقولى رأيو ويشاركنى الحاجات اللى بحس أنها حلوة فى حياتى دى وإن شاء الله أنا هبقى أجيب التسجيل برضو للى يحب يسمع

فى حاجة تانية كمان أسرة البرنامج عملو مدونة لإبداء أرائكم فى كل اللى بيختاروة من مدوناتكم واللى بيذيعوها عندهم على إذاعه مصر الرئيسية وعاوزين يسمعو أقتراحاتكم وتعليقاتكم كلها كلها ودة اللينك بتاع المدونة
http://netonradio.blogspot.com/

واللى عايز يعرف التفاصيل أزاى يعرف يسمع البرنامح والموجه وكدة هتلاقو كل دة فى تعليقهم على البوست اللى فات برضو
وبالتوفيق لكل المدونين كلهم كلهم
يلا أنا هعمل
Esc
بقى واخدين بالكو أصلها وقعت منى فى البوست اللى فات
ههههههههههههه

تخاريف تكنولوجية

2008-05-02T01:58:00.005+03:00

الحقيقة من كتر ما الواحد بقى يقعد كتير قدام شاشه الأختراع الفظيع المدعو كمبيوتر
والعالم الأفتراضى اللى بيعيشنا فيه
ودنيا التدوين اللى بقيت عايمة فيها وبقت كل حاجة تطق فى دماغى بدل ما تتخنق جوايا زى زمان أو يقولو عليا طائة بقت تطلع فضفضه مع مدونتى ومعاكو
يعنى تقريبا أتاح الفرصة أن دماغى تضرب على الأخر أكتر ما هى

حاجتين فى الدنيا دى بيخلونى عايشة ولا أليس فى بلاد العجايب
أحلامى سواء وأنا نايمه أو أحلامى وأنا صاحية واللى بتتمثل فى سرحاااااااان فظيع
والحاجة التانية قعدتى على النت
المهم يعنى الخلط بين إحساس الحلم اللى على طول عايشة بيه والقاعده المطولة اللى بقعدها على الأختراع دة وفكرة أن أى حاجة محتاجها ممكن تدور عليها وتجيبها على النت بكل سهولة كل دة ولد ضربان جامد فى الدماغ قلب بأنى بقيت أحس
أن فى حاجات بعملها على الكمبيوتر ببقى على وشك إنى أعملها فى الواقع لولا إنى بفوق فى اللحظة المناسبة لأدرك وقتها أنه يا سلااااااااااااام لو كانت موجودة فى الواقع كانت حلتلى مشاكل كتيره أوى

يعنى لو مثلا كان فى
Copy / Ctrl C – Paste / Ctrl V
يااااااااه كانت هتفرق معايا أوى لأن أوقات مثلا ينطلب منى أكتب حاجات من ورقة أو أنا أصلا ساعات بكتب اللى بيجى فى بالى فى ورقة قبل ما أنزلة بوست مش كانت هتفرق برضو وبمناسبة الكتابة كنت اتمنى لو كل كتاباتى على الكمبيوتر لأن فى الأصل خطى وحش وساعات مبعرفش أقراه بس هنقول إيه أصل العباقرة كلهم كدة

فى حاجة برضو ببقى على وشك أنى أعملها لكن بفوق فى اللحظة المناسبة واللى هى أنى باخد كوبى من على الكمبيوتر بتاعى مثلا وأبقى عايزة أروح بالماوس على كمبيوتر حد تانى فى الشغل مثلا أعملو بيست

أو لو مثلا حد حكالى حاجه وأنا عاوزة أحكيها لحد – مش فتنة يعنى لا حكاية عادية – أخد من الكلام كوبى وأروح أعملو بيست فى ودن اللى عاوزة أحكيلو على طول بدل الرغى الكتير

Ctrl F
دى بالذات بقى ببقى هموت وأستخدمها ... لانى بصادف أوقات كتير ببقى بدور على حاجة مهمه فى الأوضه عندى ومش لاقياها أو ورقة مهمه فى مكتبى ومش لاقياها ... ولا يا سلام مثلا لو كل حاجة كانت ينفع نرنلها لما نكون بندور عليها زى الموبايل كدة مثلا
ولا بقى فى اختراع نفسى يخترعوه – واللى ناتج عن كسل رهيييييييييب – يعنى لما بفتح دولاب الهدوم عندى بيبقى اوقات نفسى يكون فى زراير فى الجمب أدوس على زرار الحاجة اللى أنا عاوزاها يقوم مطلعهالى
أو زرار تانى بقايمة الهدوم وهيستورى لكل حاجة لبستها أمتى وكام مرة وأقتراحات بممكن البس إيه النهاردة مثلا كانت وفرت عليا حيرة كل يوم الصبح واللى بكون أصلا مش شايفة قدامى

Ctrl Z
أهه دى بقى حكاية لوحدها وهى اللى خلتنى أفكر أجمع الأحاسيس بتاعت البوست دة كلو
كتير أوى بيبقى نفسى أعمل أن دو لحاجات بعلمها زى ما مثلا أقول كلمة وأحس إنها مش فى محلها أكيد كانت ممكن توفر كتير من أعتذارات وكانت ممكن تحافظ على حاجات كتير فى حياتنا مهمه
أوقات فى حاجات مثلا بتضيع مننا بدوسه بسيطة على زرار وفى حاجات بنتمنى لو كنا نرجع ثانية زمن كانت تفرق كتير أوى

Invisible
حاجة بيبقى نفسى أعملها كتير أوى وخصوصا لما بكون مزنوقه ومحطوطة فى موقف وحييييييييييييييش

Restart
يااااااااااااااه لو كان فى ايدينا نعمل ريستارت لحاجات كتير يمكن كنا قدرنا نحافظ على كل حاجة جميلة لأن تقريبا فى أكتر الأوقات البدايات بتكون أجمل كتير من أى حاجة تانية بعدين
يا سلام لو كنا نقدر نعمل ريستارت لحياتنا كلها من الأول ونعيد ترتيب كل حاجة فيها نصحح كل اللى شفنا إننا غلطنا فيه ونتلاشى أخطائنا ونعتذر للناس اللى غلطنا فى حقهم ونقضى وقت أطول مع الناس اللى محسيناش بغلاوتهم وحلاوة الوقت معاهم إلا لما فارقونا .... ياااااااااااه يمكن كانت الدنيا بقى ليها طعم تانى

إيه المود اللى دخلنا فيه ده
أهو أحنا بقى دلوقتى محتاجين نعمل واحدة
Stop
ونديها واحدة
Refresh
عشان نرجع لأليس فى بلاد العجايب من تانى

تفتكرو التخاريف دى ناتجه من إيه من كسل مثلا ولا عشان التكنولوجيا اللى لخبطتلنا عقولنا
عامة والله أنا فى الزمن دة مبقتش أستبعد حاجة وكتير فكرنا فى حاجات ومكناش متخيلين إنها هتحصل فى الدنيا وحصلت أبسط مثال هو إحنا كنا نتخيل إننا كنا ممكن نكلم حد فى أى حته فى الدنيا فى حاجة صغيرة كدة من غير سلك أسمها موبايل وكمان ممكن نشوفو مثلا
يلا وما خفى كان أعظم واللى يعيش ياما يشوف

أجازات ومناسبات وأحساسات

2008-04-26T00:23:00.005+03:00

.
.

كل سنة وانتو طيبييين
فسيخ ورنجا وفى الأجازات مهيصييين
وربنا يحفظلنا بلدنا ونعيش فيها أمنييين
ما تسمعونا يا جماعة أمييييين

الأجازاااااااات .. يا سلام على الأجازاااااااات

بحبها جدا جدا جدا

وخصوصا لما تكون متجمعه وفيها مناسبات تلاقى الناس كلها فى الشارع فى وقت واحد كنت بتضايق أوى وببقى مبقوقة لما كنت فى الأيام دى منزلش زى الناس بسبب مزاكرة أو أى حاجة تانية وببقى فرحانه جدا لما بنزل وألاقى الناس كلها فى الشارع زيى وأنا زيهم
بحب لمتهم حتى لما بتعمل زحمه بس بحس أن الناس كلها منشكحه حتى لو وراها جبال هموم بس أهه فى اللحظة دى نازلين يفرجو عن نفسهم شوية
بحب يوم شم النسيم دة أوى
بحب أنزل وأتمشى فى الشمس على شط بحر اسكندرية وكان أغلب الأوقات فى المعمورة اللى بالرغم من زحمتها برضو بحبها أوى وليها ذكريات عندى حلوة أوى
بحب الفسيخ والرنجه ومعرفش ليه فى اليوم دة بالذات بيبقى ليهم طعم تانى
بحب فيلم أميرة حبى أنا (واللى جابوه يوم ما اتولدت زى ما مامتى بتقولى ومعرفش عرفو منين انى اتولدت) وأغنية الدنيا ربيع لانى ومعرفش ليه بالرغم من أن الربيع بيبقى بدأ من بدرى إلا أنى بحس أن يوم شم النسيم دة هو بداية الربيع وأغنيه سعاد حسنى بتعمل لليوم طعم تانى

يوم تحرير سينا دة بقى
بحب فيه أحساس النصرة اللى غايب عننا بقالو كتير
بحب فيلم الطريق إلى إيلات واللى مهما بتفرج عليه مبزهقش منو وأفضل قلقانة برضو طول الفيلم عليهم وبيبقى عندى أمل أن مرسى (اللى هو عبد الله محمود) ميمتش ويرجع معاهم ولمريم وبرضو بلاقى نفسى عاوزة أعيط فى أخر الفيلم

بحب أوى حاجة تانية كدة يمكن ملهاش علاقة بكلامى بس هى مربوطة بكل الأحاسيس دى اللى هى
وأنت ماشى فى طريق الساحل أو مصر اسكندرية او مطروح يعنى اى طريق هاى واى تقوم تلاقى العربيات اللى جاية من الطريق المعاكس ليك بتقلبلك نور عشان فيه لجنه او ردار قدام تقوم انت تنورلو حته كدة كأنك بتشكرو وتقوم مهدى عشان تتفادى الخطر الحكومى اللى جاى عليك

ياااااااااه بيبقى احساس حلو اوى

تحس كأن الطريق كلو عيلة واحدة مع ان الناس متعرفهاش بس هما خايفين عليك وفى تواصل بين الناس

الله ... كل دى ذكريات وحاجات حلوة بحبها اوى
ربنا يديم علينا كل جميل يارب ويحفظنا ويجمعنا على خير دايما مع اللى بنحبهم
ياااااااااااااااااااااااااااارب

ملحوظة صغننه انا هسيب علبة كلورتس على باب المدونة عشان ريحه البصل بس ها
وكل سنة وأنتو طيبين

أنا وموبايلى واللى بحلم بيه

2008-04-23T01:34:00.007+03:00

من فترة وأنا عاوزة أغير موبايلى
بس مش عشان موبايلى وحش لا طبعا قطع لسان اللى يقول عليه كدة دة موبايلولى بحبو أوى وحلو ومية مية
بس نظرا للتقدم السريع فى التكنولوجيا العصرية المهلبية
واللى بتخلى الواحد تطلعاتو تزيد يوم عن يوم غصب عن عين اللى خلفوه ومن غير ما يكون ناوى ولا فى باله من أصله
المهم طبعا وبالرغم من حبى لموبايلى القديم زى ما قلت وبأكد إلا إنى كنت وزى أى حد فى الدنيا بحلم أن يكون مثلا عندى كاميرا ماشيه معايا فى كل وقت وفيديو كمان
أغانى بقى وألعاب ويتفتح ويتقفل وهبل وهيافه كدة ما أعرف إيه
طبعا بقى دة غير الشكل الشيك المتقدم اللى هو بتاع العوجان دة
المهم يعنى فضلت أحلم بحاجات فيه محتجاها كتير وأتخيلها بأدق تفاصيلها زى ما أنا حباها ومحتجاها وأتابع بقى الجديد وأقعد أتفرج وأقول دة حلو ودة نفسى فيه ودة مش عارف إيه
وأروح هنا أقول أااااااااه لو كان معايا موبايل بيعمل كذا ولا كذا
المهم
النية كانت موجودة بس مش ملحة أوى إنى أروح أشتريه كلها مجرد أحلام يعنى

لحد ما سبحان الله وفى لحظة تتاح ليا فرصة أن يكون عندى موبايل أتمنيتو واللى كان غالى أوى بس فيه كل اللى حلمت بيه لكن مفكرتش إنى ممكن أجيبو دلوقتى خالص
لا وإيه كمان هيجيلى من برة وسبحان الله ألاقيه أرخص كمان كتير يعنى وصل للى كنت بتمناه
وفجأة ألاقيه فى إيدى مع أنى ما تخيلتش أنو يكون معايا فى الوقت دة بالذات
وفجأة ألاقى كل اللى حلمت بيه أتحقق كلو بكل تفصايله وعلى غفله ومن غير تفكير
يمكن لو كنت فكرت مكنتش أخدت القرار إنى أجيبو وخصوصا إنى طلعت اللى كان تحت البلاطة كلو تقريبا
هههههههههههههههههههههههه

لاقيت نفسى بقف مع نفسى لحظة وبفكر
ياااااااااااااه
سبحان الله فكرت كتير
وحلمت كتير بكل التفاصيل
مكنتش مستعجلة صحيح بس كنت برضو عاوزاة بشدة
صبرت ؟؟ .. يمكن صبرت
أتمنيت من ربنا انى أجيبو زى ما بحلم؟؟ ... يمكن فعلا

يعنى طب هو ممكن كل اللى بحلم بيه يتحقق بالشكل دة
يعنى هو ممكن فجأة ألاقى اللى حلمت بيه وتخيلتو بعيييييد أوى ومتخيلتش أنو يجيلى بكل التفاصيل اللى حلمت بيها لا وأحسن كمان ألاقيه فجأة بين إيديا
ولايق عليا

طب هو كل حاجة ممكن الواحد يصبر عليها بالرغم من اختلاف شغفو بيها
يااااااااااااااااااه
طب أنا نفسى اللى بحلم بيه يتحقق كدة دلوقتى
ياااااااااااااااااه
ياريت كانت الأحلام كلها سهله كدة

ايييييييييييييييه
طب ادعولى بقى

ولموبايلى القديم بقول أوعى تزعل يا روح قلبى أنت عارف أنت غالى عندى برضو ومش هنساك دة أنت أول الأيد ما شرت يا لولو هى ماما بس جابتلك أخ
أخخخخخخخ .. شكلى ضربت

يلا سلام وسمعنى أحلى رنة
ههههههه

سهر الليالى فى الإذاعه

2008-04-15T03:06:00.005+03:00

بلغنى أيها الملك السعيد
ذو الرأى الرشيد
أنة وفى تعليقات البوست اللى فات
علق احد السادات
والغير معروف لدينا
بأن سهر الليالى سوف يكون لها شأن إذاعى
فى اليوم الفلانى لأنها عجباه أة يانى
فى بادىء الأمر لم تصدق البت ميرو هذا الكلام
مع أنها زارت الموقع المذكور بالإعلان
لأن برضو الموضوع كبييير يا جدعان
أنتظرت حتى ذلك اليوم
وقبل الموعد المذكور أيقظت كل المنزل
لأستقبال ما هو منتظر حلو كان او جزر
ومع أنطلاقة صوت المذيع بدأ القلق يزيد والدموع تسيل
فإذا بالخبر صحيح
وكانت المفاجأة سارة للجميع
وهنا أدرك شهرزاد الصباح فسكتت عن الكلام المباح

كان معكم الست شهرزاد فى موجز لأهم الانباء
وإليكم الخبر بالتفصيص

البوست اللى فات لاقيت كومنت من حد غير معرف بيقول ان مدونتى هتكون ضيفة لبرنامج إذاعى على إذاعه البرنامج العام الإذاعه الرئيسية لمصر الساعه تسعه وعشرة صباحا
تخيلو انتو حد بيقولكو كلام زى دة فى حاجة بتكتبها لانك مجرد بس حاسس بيها

طبعا أنا مصدقتش نفسى حتى بعد ما زرت الموقع قلت يعنى إزاى يعنى اكون ضيفة ومعقول مدونتى المتواضعه هيتكلمو عنها فى الإذاعه
المهم بسمة صديقتى فى مدونة البنات عايزة ايه قالتلى ان الكلام مكتوب هناك برضو وأن فعلا فى برنامج بيتكلم عن المدونات فى نفس الميعاد
يوم السبت اللى فات واللى كان هو المعاد المنتظر صحيت من النجمه على عكس عادتى فى الأجازات طبعا وظبط الراديو والموبايل كمان لتسجيل تلك اللحظة الجليلة
وإذا ببرنامج أسمه أنت تسأل والكمبيوتر يجيب يبدأ ويدخل المذيع الأستاذ صلاح حجازى بصوتو الجهور يتعجب من أنتشار المدونات فى شكل سؤال وإذا به يقول أنهم هياخدو الإجابة من صاحبة مدونة سهر الليالى

بتقولو مين يا ولاد؟؟ .. سهر الليالى
تبدأ موسيقى خفيفة ويظهر صوت واحدة ست وإذا بها بتقرا بوست أنا ومدونتى ويوم الحب بطريقه إلقاء زى ما انا كاتباه
مش قادرة أقولكو مقدار الفرحه اللى كنت فيها وقشعرة فى جسمى ودموع متعلقة فى عينى وانا بسمع كلام كنت كتباه على لسان حد بالطريقة دى
مش قادرة اقولكو كانت فرحتى قد ايه لما أمى سألتنى " هو بصحيح يا ميرو أنتى اللى كاتبه الكلام دة " وكانت مبسوطة وتقريبا مستغربه
مش قادرة أقولكو كان كبير اوى عندى إزاى معنى ان كلامى كان مادة لبرنامج إذاعى حتى لو لمدة عشر دقايق بس وفى ميعاد بدرى يعنى ممكن محدش كتير من المدونين يكون بيسمعو بس كون ان فى حد يحترم من الإذاعه كلف خاطرة وزار مدونتى المتواضعه ونقى منها موضوع وأستضافو بالشكل الجميل دة

دى حاجة كبيرة اوى عندى

بجد أنا مبسوطة
وحبيت أشاركو الأحساس الجميل دة
والحمد لله على كل اللى أنا فيه ده وربنا يوفقنى لما يحب ويرضى

وليكى مدونتى بقول
ميرسى على كل اللى انتى بتعمليهولى

ويارب دايما فى الخير

ولو عرفت أجيبلكو التسجيل للى يحب يسمع هجيبو

يلا بقى كفايه كدة

هكذا هى

2008-04-08T00:50:00.007+03:00

تمر الأيام ويمضى بنا قطار العمر
تعصف بنا الدنيا حيناً وتهدهدنا حيناً وبين هذا وذاك نحيا ونتعلم
نتعلم أشياء ونغير أشياء ونتغير معها بذات الوقت

نتغير دون أن ندرى وتتغير نظرتنا للأمور
تتبدل شخصياتنا بما لم نكن نتوقع يوما أن نكون
نرضى حيناً ونندم حيناً
نرضى عن ما وصلنا إليه ونستمتع
ونندم على أشياء فعلناها ونتمنى لو كنا فعلنا أشياءا أخرى

وقرارات أتخذناها كانت من الممكن أن تغير مسار حياتنا

نقابل أناسٍ ونندم على معرفتهم وقد نكره أنفسنا معهم
ونقابل أخرين نتمنى لو نكمل معهم المشوار
وأخرون نتمنى لو كنا أتحنا لهم الفرصة أن نعرفهم جيدا
فأحيانا لا نقدر قيم الأشياء إلا بعد أن نرى غيرها
فكم تمنينا لو أننا أعتذرنا أو قضينا أوقاتاً أطول مع أناس فارقونا

قد نعجب بأشخاص ونتخذهم مثلنا الأعلى
ونتمنى لو نصبح مثلهم يوما وقد ننجح
ولكن الأصعب أن نصدم فيهم بعد تحول الصور
ونبغض أشخاصا وقد نتحول إليهم يوما

نقضى العمر بحثا عن أشياء قد نجدها أو قد لا ننجح
وقد نغفل وسط الزخم عن أشياءا جميلة نملكها فعلا

نعيش مواقف وظروف ونتعجب
فقد كنا نسمع عنها فقط ولم نكن نتخيل أن نكون نحن أبطالها يوما

نكون يوما فى أشد الأقتناع بأشياء وقد نتحول عليها ونرفضها يوما

وقد يصبح ما رفضنا يوما من أحب الأشياء إلينا

نربى ونكبر على قناعات ومبادىء
وكثيرا ما نصدم بواقع ما نعيش

نتعجب ونتعجب
ونقف ونتأمل
وبالرغم من كل شىء نمضى مع الأيام

أأأأأأه

2008-03-26T18:01:00.004+03:00

أأأأأأأأأه منك يا ذلك الشعور

يا تلك الغصه

أمازلتِ هنا

ماذا بكِ

أما سئمتِ منى بعد

كفاك أرجوكِ فما عُدت أحتمل

فأنا من سئمتُك

ملاقيش عندكو حد يطمنى

2008-03-24T00:37:00.007+03:00

من فترة كبيرة ومش صغيرة أنصب كلام الناس كلو عن أزمة العيش وطوابير العيش والمهازل اللى بتحصل فى الموضوع دة

ناس كتير أتكلمت وناس كتير كتبت دة غير الصورة الواقعية اللى بنتفرج عليها كل يوم وأحنا معديين من قدام أى فرن لدرجة أنى أصلا مش محتاجة أعدى قدام الفرن لأن بيوصلنى صوت خناق الناس - من الفرن اللى بيبعد عن بيتنا حبة صغيرين – من وأنا نايمة فى سريرى

لا ومش العيش وبس خدو عندكو إزازة الزيت اللى عدت العشرة جنية وعلبة السمنة اللى بقت بخمسة وسبعين جنيه وحاجات كتيييييييييير تانية ولعت بس لسه متحرقتش لأن الناس برضو لسه بتشتريها دة غير الفول والفلافل والله على رأى محمد هنيدى يا عينى ع الفقير يا ولدااااااه

ولون دلوقتى أعتقد أختلف مفهوم الفقير عن زمان طبعا لأن برضو سبحان الله بالرغم من كل الازمات دى تلاقى كم رهيييييييييييييب من العربيات الفاهرة ويقولك الناس بقت غلابة يا عينى .. دة مش نق ربنا يسهلهم بس بحس بتناقض غريب موت

ولا ييجى يقولك بقى أن السكان بتزيد .. يا لهوى والله العظيم أحنا ناس زى الفل ومية مية .. ميتنا ملوثه وأكلنا ملوث وهوا ملوث مفيش بعد كدة يخش يكتم فى الصدر كدة تمام .. ومع ذلك بنزيد شفت حلاوة أكتر من كدة يعنى مهما يحاولو يطفو الشمس .. قصدى مهما يحاولو يبيدو الشعب كأن الشعب معاند معاهم

المهم أنا مش جاية أتكلم فى الغلا والزيادة لان دة سبق وناس اتكلمت كتير فيه لكن اللى أنا لمستة أكتر وراعبنى وخلانى أتكلم اللى انا حاسه أنو اترتب على دة كلو واللى أنا خايفة منو – ماهو كتر الضغط يولد الانفجار يا عالم

قدام الشعب حاجة من تلاتة كردود فعل طبيعيه للحالة اللى بنواجها واللى هى لما الناس مش بتلاقى اللقمة اللى تاكلها ... يعنى مش جايه أهدى النفوس مثلا

يا إما يفضل خاضع لكل اللى حاصل وبيكيف نفسو وحالو على اللى حاصل

ودة ممكن ناس تنجح وتتأقلم مع كل زيادة وفى الغالب الناس دى هتلاقى نفسها بتنحدر فى الطبقات يعنى بعد ما كانت غنية تبقى متوسطة إلى فقيرة وهكذا وممكن ناس تفشل بس لسه ضميرها يكون صاحى فتموت من الجوع فى هدوء من غير ما حد يحس بيها

يا إما – ودة اللى حاصل فعلا – الناس لما مش بتلاقى تاكل مع قلة الإيمان والوعى والتعليم بتتجه للنهب والسرقه والبلطجة ودة اللى أنتشر اليومين دول وبجد خلانى أخاف موت على بلدى اللى بحبها اوى

سرقة بالإكراه فى أرقى الاماكن وبغض النظر عن جنس اللى بيتسرق يعنى محدش يقولى أنى لازم أكون ماشيه مع راجل عشان أكون فى حمايتة لأن فى الغالب بنتسرق أحنا الاتنين لدرجة بتوصل للهدوم والجزم ولمؤاخذه

دة غير السرقات اللى بتم فى وضح النهار وفى نص الشارع يعنى مش بعيد ألاقى باب بيتنا بيتفتح علينا وأحنا فى نص النهار وألاقى الحرامى داخل بكل زوق وأدب وخصوصا وأحنا معندناش بواب حتى ولا عندنا بواب مبقاش فارق

يا إما بقى هتلاقى الناس تفوق وتثور ثورة بقلب رجل واحد – زى ما بنسمع الجملة دى فى أفلام زى صلاح الدين كدة مثلا – أو زى أيام سعد زغلول وثورة ستاشر والحريم تصوت وكدة

ويمكن يقدرو يعملو حاجة صحيح بس ساعتها هكون خايفة على بلدى أكتر من الهلاك لأن العواقب غير مضمونة بس يمكن وقتها يتولد عندنا رجالة بجد ومتفهمونيش غلط لأن قصدى أن حاليا كل واحد ميت من كتر الهموم اللى جواه – رجالة على الأقل لو مقدروش يغيرو يكونو رجعو أخلاق زمان لما كان حد يقول أة فى الشارع الناس كلها تجرى تقولو سلامتك مش دلوقتى كلو بيقول أنا مالى وعندهم حق ماهو ممكن يدخل فى مشاكل ميعرفش جت منين

يا جماعه اللى بنتكلم عليها دى بلدنا .. بلدنا اللى بنحبها وأتربينا فى حضنها .. دة مش كلام وخلاص ولا أنا جاية أعمل إحباط لكن أنا بحب بلدى وخايفه عليها بجد وعلى الأقل ليها حق علينا لاننا اتربينا فيها

زى أمهتنا كدة عمرنا ما قلنا أحنا بنحب أمهتنا عشان هما أجمل حد فى الدنيا لكن عشان هما أمهتنا اللى أتربينا فى حضنهم

الكلام دة بقولهولى أنا قبلكو صحيح أنا يمكن مش فى ايدى حاجة اعملها لكن جاية ونفسى حد يطبطب عليا ويقولى متخافيش بلدنا هتبقى بخير وفرج ربنا قريب إن شاء الله

وأنا من عندى هحاول على قد ما أقدر أساعد أى حد يقول يلا نصلح ولو أنا مش عارفة أعمل لها حاجة كويسة يبقى هحاول على الأقل أنى معملش حاجة وحشة تسىء ليها

اللهم أحفظنا وأمنا فى وطننا الحبيب وأحفظة لنا وأرضى عنا وأرفع عنا البلاء يارب

.

كلام من قلبى بس ميوفكيش حقك

2008-03-21T03:11:00.004+03:00

بحبك ... بحبك أوى .... والله العظيم بحبك

عارفة أنك عارفة ومش محتاجة أنى أقف وأقولهالك
بس ساعات الواحد بيحب برضو يسمعها

عارفة أنك مش محتاجة ليوم نحبك فيه ولا نقولك اليوم دة بالذات ربنا يخليكى لينا
دى أيام الدنيا كلها متكفكيش
بس أنا أخاف لو أنا مقلتلكيش كل سنة وأنتى طيبة فى اليوم دة وسمعتى حد تانى بيقولها لمامتة تتمنى لو كنتى سمعتيها وتزعلى حتى ولو من جواكى وأنا مقدرش على زعلك

عارفة أنى مش أحسن الناس وأنك كنتى تتمنى أنى أكون أحسن الناس
بس والله بحاول وأتمنيت أنى أكون أحسن حد عشان خاطرك وكان نفسى أخليكى أسعد حد فى الدنيا ونفسى أطلع زيك مش عشان أنا بحبك وأنتى أمى والكلام دة ... لا ... عشان أنتى جميلة أوى ... بس مش أنا شبهك برضو

يمكن مش لاقية كلام قد اللى أنا حاسه بيه ويمكن فى كلام كتير أوى على بالى أقولة ومش عارفة أكتبه كله
بس أنتى أمى وحبيبتى وصديقتى

فى حضنك بتضيع كل همومى لما بتكونى راضيه عنى وبتضحكى بحس أن الدنيا كلها جميلة وبتضحك و لما بتزعلى ببقى مش طايقة الدنيا واللى فيها ... مبستريحش من همومى إلا لما بتشاركينى فيها معرفش بتعملى ايه بس بحس أنك أكتر حد بيفهمنى وبيريحنى ... ويااااارب أكون أنا بالنسبالك كدة كمان ... ولما بفرح من حاجة مبتكملش فرحتى إلا لو حسيت أنك أنتى كمان فرحانة

أمى سامحينى لو كنت يوم زعلتك .. ما أنتى عارفانى ... وبعدين عيلة وغلطت
ومعلش بقى عارفة أنك أستويتى من دماغى وأفكارى الطائة اللى بقعد أصدعك بيها .. بس هنعمل إيه بنتك برضو ولازم تستحمليها ومبحسش أنى فى حد فى الدنيا بيشجعنى قدك لأنى عارفة أن مفيش حد فى الدنيا هيحبنى قدك

ربنا يخليكى ليا يا أمى وميحرمنيش منك أبدا ويقدرنى ربنا أنى أبرك على قد حقك وأسعدك على قد ما تستحقى وأكتر كمان
وتفرحى بيا بقى يا أم ميرو وعيالى يخدو دورهم معاكى بقى

كل سنة وأنتى طيبة يا أمى

عفواً

2008-03-18T14:35:00.003+03:00

نأسف لأنقطاع الكهربا عن المدونة وذلك لحدوث عطل فى جهاز الكمبيوتر العمومى لبيتنا – خير اللهم أجعله خير - مما تسبب فى تعذر متابعه المدونة والرد على تعليقات الناس الجميلة اللى عبرتنى وحدوث تأخر واضح فى نزول أى بوست أو حلم أو أى حاجات تانية كتير وتعذر متابعه وزيارة أصدقائى المدونين اللى بحبهم جدا وذلك لضيق ذات اليد لان مش نافع لا كشاف ولا حتى شمعه حتى سرقت كابل كهربا وشمعه من الجيران عشان أنزل الأعتذار دة فأرجو قبول أعتذارى – يعنى لو كان لسه فى حد متابع - على أن أعاود المتابعه بعد أن يتم شفاء الكمبيوتر قولو يارب

وحشتونى ووحشتنى مدونتى والتدوين ودعواتكو معانا بقى

أة فى حاجة كمان
كل عام وأنتم بخير بمناسبة المولد النبوى الشريف وربنا ينصرنا ويعز الإسلام والمسلمين

تهييس مدونين

2008-03-02T23:22:00.003+03:00

بصراحه البوست دة أترددنا كتير إزا كنا نعملو أساسا ولا لا لانو كان تحدى أصلا ولما عملناه وأخرجتو وحطيتلو الرتوش النهائية أترددت أوى أنى أنزلو لكن الفترة اللى فاتت خلتنى أقرر أنى أجازف وأنزلو بهدف واحد بس

لأن الفترة اللى فاتت صديقتى العزيزة عليا أوى دكتورة لماضه هانم كانت مأريفه حبتين ومودها كان وحش اوى
فقررت أنزل البوست دة عشان أقولها بجد أنى بحبها أوى وأنها بنت زى العسل وأنها فراولاية جوا العالم التدوينى
وأنى كنت مبسوطة اوى أن ممكن هيكون فى بوست بمشاركتها حتى لو كان تهييس لأنى مينفعش أشاركها فى مستشفى ولا عيادة مثلا ولا حتى فى إزازة دوا

من الاخر وحشتينى يا لمضتى ومنقدرش على زعلك يا قمر

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

كان يا ماكان فى سالف العصر والاوان
وفى ليلة شتوية
وليست بقمرية
والبرد فيها مية مية
والشتا مغرق الدنية
وعلى إحدى الشات روم بالياهو مسنجر
كانت تجلس لماضة وسهر فى إحدى ليالى السمر
ودار بينهم الحديث الأتى

لماضة : السلاموووووو عليكووووو
سهر : وعليكووووو السلاااااااااام
لماضة : اهلا اهلا عامله ايه
سهر : حلة محشى فضلة خيرك تستاهل بوقك
لماضة : طب احدفيلى صوبعين

سكوت لوهلة يظهر أن الصوباعين وصلو
ثم تعاود سهر الليالى مباغته بالكلام بعد أن أطلقت كحة وصعبت عليها نفسها

سهر : مش انا بكح جامد
لماضه : قلتلك غيرى الصنف
سهر : هههههههه منا عاوزة احول بانجو بدل الحشيش اللى دوخنى
لماضة : ههههههه بانجو انتي تاني حشيش فايدة فيكي
سهر : بس مش عارفة هيبقلونى تفتكرى
لماضه : لا متقلقيش هقولهم دي تبعي ممكن تاخدي .......... دة كويس
سهر : ودة ايه ده ياختى حشيش برضو
لماضة : ههههههه يخرب بيت الصنف اللى لحس مخ الشباب لايابت ده دوا كحة بس حلو هيريحك خلال يومين ان شاء الله
سهر : ماشى يا ست الدكتورة
لماضة : انتي ناسيه انك بتكلمي باش دكتوره ولا ايه
سهر : ايون وياخوفي لا تطالبينى بالفزيته
لماضة : هههههه لا عيب انتي صحبتى وحبيبتى وكفاءة
سهر : من القلب للقلب والله

يعم لحظة سكون تانية بس المرة دى مش عارفين ايه السبب
Buzz يكسر هذا السكون واحدة من سهر الليالى تديها للبت لماضه وتجيبها جوووووون

سهر : رحتي فين ؟
لماضة : مش لاقية فردة الشراب رجليا اتجمدت الساعه قربت على 12 عجبك كده سندريلا من غير شراب معايا فردة واحده بس
سهر : يارب الأمير يلاقى الفردة التانية طيب
لماضة : هههههه طيب مش تقوليلى كنت حطيت عليها برفان بدل ما نتفضح كده
سهر : لا متقلقيش ماهو لو لاقاها الامير ساعتها مش هيهمو ريحه ولا بتاع المهم يجي ويلاقيها
لماضة : ههههههه استرها يارب وبعدين بقى كنت نايمة بفردتين صحيت بفردة واحده ومش لاقية التانيه قلبت السرير كده بدأت اقلق
سهر : شوفى انتى بتعملى ايه وانتى نايمه يا هاااااااااااانم
لماضة : ههههههه خايفه اكون كلتها اصلى متعشتش امبارح .... عااااااااااااااااااااا
سهر : هههههههههههههه يا لهوي طيب دوري تاني بقى وطمنينى عليها
لماضة : مش لاقياها هتجنن

بعد شويه

لماضة : هييييييه لاقيتها الحمد لله
سهر : طب الحمد لله ولاقتيها فين دى
لماضة بأستغراب : ورا السرير تخيلى !!ز
سهر : يا لهوى ... انا لو منك اعاقبها
لماضة : هههههههه ايوه هغسلها عشان تحرم
سهر : أيوة وانشريها فى السقعه دى لوحدها برة
لماضة : ايوه الحق عليا انى حافظت عليها ومردتش اغسلها
سهر : ليه هو انتوا بتعملوا ايه فى الغسيل بتعذبوه
لماضة : هههههه مش اسمها فردة شراب لازم تبقى معفنه وعقابا ليها هتتغسل
سهر : ههههههههههههههههه

لماضة : اوعي تاخدي فكرة وحشة عني انا مع كل لبس خروج او بيت ليه شرابه اللون بتاعه وكله لبسه واحده واغسلها والله
سهر : لا دة انتى كدة تهرى الشرابات
لماضة : فعلا ده اللى بيحصل
سهر : بس برضو كويس الغسيل عشان النظر برضو
لماضة : هههههههههه ايون

بعد حبة تانيين

سهر : انتي يابنتى
لماضة : معلش النت فصل يظهر ذنب فردة الشراب
سهر : ههههههه لا دى فردة شقية ... وبعدين تفتكرى كانت مستخبية ورا السرير ليييييييييييه يا ترىىىىىى خايفة منك مثلا ولا ايه ؟؟ ولا تكونش هرباانننننننننننة ... امممممممم
لماضة : هههههههه لا تقريبا كنت بلعب شقلباظ طارت مع ان نومي هادي والله لان كل العفرته بكون طلعتها طول اليوم
سهر : هههههه لا بس لازم ندرس سبب انها استخبت ورا السرير
لماذا فرت فردة الشراب من البت لماضه ؟؟
ماذا كان الدافع الحقيقى وراء اختفائها ورا السرير؟؟
هل هى كارهه لعيشتها معاها ؟ ام لنومها ؟ او لرائحه ارجلها ؟

شارك وابحث معنا عن حل اللغز تربح معنا شرابات بالهبل
لماضة : ههههههههههههه ام لانها قررت تعاقبنى وتجيبلى انفلونزا الرجلين هذه الفردة بنت الحذاء امشى انا بفرده واحده عجبك كده
سهر : هههههههههه طب ما يمكن كانت مخاصمة الفردة التانية وانتى ملكيش ذنب ... او مثلا الفردة التانية كانت مهدداها بحاجة و ماسكة عليها ذلة
لماضة : ههههههههه بت انتى متطلعيهاش فى دماغي انزلها بوست وانا مجنونه واعملها
سهر : هههههههه خلاص ويبقى بوست بمشاركتى وابقى من أبطال البوكيمون واشتهر هىهىهىهىهى
لماضة : هنقل المحادثه زي ما هي ... و ان شاء الله نبطل بعدها انا وانتى تدوين ... وانا لا شفتك ولا اعرفك ... وهطلع اجري بفردة واحدة
سهر : ايوووووووة ع البيع
لماضة : ايوه زي ابو رجل مسلوخة
سهر : حتهربى مع الفردة التانية يا خسيسة
لماضة : ايون وخلى بقى سعيد الحظ يمسكها

وكانت أخر الكلمات هى تلك " سعيد الحظ " وبعدها
عم الصمت المكان
حتى غلبهم النعاس
أمام شاشه الجهاز
ليغطو فى نوم وثبات
ويحلموا بأمراء وشرابات
يعيشو معاهم فى تبات ونبات
ويخلفو مدونين ومدونات

وكانت هذه ليلة تهييسية من ليالى البرد العتية
التى أثر فيها البرد يا حرام على دماغ المدونين يا كرام

تنويه هام جدا جدا : ها
أحداث هذا البوست من الواقع فأى تشابة فى الشخصيات أو الاحداث لم يأتى بمحض الصدفة وإنما هو مقصودون مقصودون يا ولدى
" عبارة شفتها كتير فى تترات الأفلام وكان نفسى أستخدمها من زمان "

مع تحيات لماضة و سهر الليالى

السيره أطول من العمر

2008-02-29T02:55:00.005+03:00

من حبة أيام فاتو أول شهر فبراير تحديدا يوم 9 /2 /2008 رحل عن الدنيا وعنا الصحفى والإعلامى الكبير الأستاذ مجدى مهنا

لم أكن أعرف عنه إلا أنه كاتب وصحفى بجريدة الوفد ثم بالمصرى اليوم وله برنامج سياسى يقدمه على قناه دريم ولأنى ليس لى أهتمامات فى السياسه على الإطلاق فلم يواتينى الحظ أن أتعرف عليه عن قرب من خلال كتاباته

وقبل أيام من وفاته ومن خلال متابعتى لعمود الصحفى الجميل خيرى رمضان " يوم ويوم " على صفحات المصرى اليوم كان مقاله فى ذلك اليوم عنه بأسلوب التساؤلات عنه و من هو ذلك الشخص الذى يحبه الناس بهذا القدر من هو ذلك الشخص الذى يعرض أحد الشخصيات النافعه للناس أن يتبرع له بكبده لأنه قد يكون أنفع للناس منه

تساؤلات تقودنا فى النهاية إلى مدى جمال ونقاء ذلك الشخص تساؤلات لابد أن تقود من يقرأها إلى أن يفهم أن هذا الشخص محبوب بل ليس هذا وحسب بل تقوده إلى أن يحبه هو الأخر ويرفع يده للسماء داعيا له بالشفاء

بعد أيام فوجئت بخبر وفاته وحزنت بشكل غريب ولا أخفيكم سرا كان من الممكن ألا أشعر بما حدث لولا عمود خيرى الذى تمنيت بعده أن يمن الله على الأستاذ مجدى بالشفاء من قلبى لما وصلنى عنه ولرغبتى فى أن تتاح ليا الفرصه من جديد واقرا له

ولكن ما أذهلنى حقا ما أحدثه خبر وفاتة فى قلوب الناس الذين أحبوه وعرفوه وكم كلمات العزاء التى أمتلأت بها صفحات جريدة المصرى اليوم بما تحمل من مشاعر حب دافئة لذلك الإنسان الجميل وحتى يومنا هذا حتى ببرامج التليفزيون وحتى من الاشخاص الذى لا تربطهم علاقه بالسياسه

واستعجبت كثيرا أيمكن أن يجتمع كل هؤلاء الناس على حب إنسان بهذا الشكل !! أكان حقا بهذا الجمال أم كعادة البشر أنهم إذا طوى الموت واحدا منهم ذكروا محاسنه

لم أنتظر رداً لأنى وسبحان الله وصلت محبة هذا الإنسان فى قلبى على الرغم من عدم معرفتى له إلا من خلال ما حدث ومن بضع كلمات كانت جريدة المصرى اليوم أعادت نشرها مرة أخرى أمتلأت سطورها بما يحمل قلب ذلك الإنسان من جمال وحملتها إلى قلبى كلمات فى الحب أذهلتنى وهزت قلبى ودة اللينك بتاعها

وكلمات من أحبوه والجميل أنهم كانو أشخاصا متفرقين كتبو عنه مواقف متنوعه كما كتبو عن حبه لبلدنا الحبيب وإخلاصه فى ذلك الحب حتى أن أحدهم رسم له كاركاتير أكثر من رائع

وكان من ضمن من لفت نظرى كلماتهم كلمة كتبتها صحفيه مبتدأة لم تتخطى معرفتها به إلا موقف فعله معها واحترامه وتشجيعه لها مع أنها لم تكن إلا صحفية مبتدأة وكان عنوان ما كتبت مثل شعبى دوما ما كانت تردده جدتها " السيرة أطول من العمر " وشعرت بأنطباق ذلك المثل عليه وأنا الأخرى كان ذلك نفس شعورى
فتأملت ما كتبت ووجدت أنه نعم لا يبقى من الإنسان إلا سيرتة - إن بقيت - حلوة كانت أو سيئة فكل شىء باقى ولا يشترط أن يتذكر الناس محاسن موتاهم فقط

فى النهاية إنا لله وإنا إليه راجعون وأسأل الله أن يتغمد الجميل مجدى مهنا برحمته ويجعل كل هذا الحب من حبه له ويسكنه فسيح جناته وأن يحسن ختامنا جميعا ويجعل ما يبقى منا هو العمل والسيرة الصالحه

اللهم لا تقبضنا إلا وأنت راض ٍ عنا

فى الممنوع
وداعاً

أنا ومدونتى ويوم الحب

2008-02-14T01:04:00.007+03:00

لم أكن أتخيل أنه يوما ً سيأتى وأشعر بمثل هذا الشعور
شعور غريب أنتابنى عندما شاركت صديقاتى البنات الجميلات فى

مدونة البنات عايزة إيه

فقد غارت مدونتى
نعم أنتابنى شعور بأن مدونتى غارت علىّ
ولا أعلم هل كانت هى من غارت أم كنت أنا من غار عليها
ولكنه كان شعور حقيقى بقلبى لدرجة أنى رغبت فى ضمها لأنى أعلم بمدى قسوة ذلك الشعور على النفس
ولكنى من ناحية أخرى فرحت لأحساسى أنها تحبنى كما أحبها أنا

وها أنا اليوم تحديداً أقرر مصارحتها

نعم مدونتى أحبك .... ولطالما أحببتك
وكيف لا وأنا معك أكون فى أوج راحتى
وكبف لا وكل تدونيه خطتها يدى كانت نابعه من قلبى بكل احاسيسى وأتيتك أشاركك إياها
ولطالما أحتملتينى وأحتويتى صراخاتى وغضباتى يأسى أملى دموعى وجنونى
وكنت أهرع إليك فرحاً بما يحمل قلبى من احاسيس الفرح لمشاركتك إياها
حتى أقل القليل الذى قد يراه البعض تفاهات مع أنها أشياء تمثل لى معانى كبيرة لم تكونى مثلهم بل أهتتمتى بها وبى ولم تبخلى علىّ يوما بما أحتجت

وبك غزوت عوالم لم أكن أتخيل أنى سأدخلها ... وتعلمت أشياء سررت بمعرفتها واستفدت كثيراً منها
ولدتى فى حياتى بين ليلة وضحاها ولكنك غدوت بها من أهم ما أملك
فما عدت أحتمل أن يمر اليوم دون أن ألقى بنفسى بين يديك شوقاً إليك

حبيبتى الجميلة وطفلتى الصغيرة
بإذن ربى لن يأخذنى منك أحد فأنتى وحدك متربعه على عرش قلبى
وسامحينى إن كنت قصرت فى حقك ولم أكن معك بمثل ما كنتى معى

فشكرا لكِ مدونتى
ودمتى لى راحتى ومتكأى

فتقبلى باقه الورد هذه منى فى يوم حبٍ لنا
أحبك

وخدى منى بقى البؤين دول

مدونتى حبيبتى يا حلوة يا مووززة بحبك يا بت وحبك مشعشع فى قلبى

يارب تكبرى واشوفك احلى عروسة بين المدونات وأجوزك وأفرح بيكى كدة

وأوعى تزلعى منى بقى أوك

ــــــــــــــــــــــــــــــــــــــــــــــــــــــــــــــــ

أصدقائى وأصدقاء مدونتى
يوم حب سعيد جميل عليكو ياااارب
ودمتم بكل الحب

المرة دى ألف مبروك

2008-02-11T01:35:00.000+03:00

أيوة زغروطة تانية وتالته كمان
أصل أنا بعشق الفرح والهيصه
بس المرة دى الزغروطة طالعه من القلب

ألف مبروك يا مصريين علينا كاس افريقيا وعقبال كاس العالم
ايييييه .... لا متقولوش كدة .... أة نقدر بس انتو قولو يارب

لأننا فعلا لو صممنا على حاجة وأجتهدنا وعملنا اللى علينا مع دعوات المصريين أهل القلوب الجميلة بنعمل كتير أوى والله زى ما شفتو لأن فريقنا عمل شغل جامد وربنا كلل تعبهم
بس عايزين نجتهد فى كل حاجة بقى ونصمم كدة على النجاح عشان اكيد والله هننجح
أحنا حلوين اوى بس نفوق

مبروك يا مصر مبروك يا كل المصريين

أة وتنويه هام كمان بالمرة ياريت برضو كل لاعيب وهو نازل من باب الطيارة كدة يرش حبه من اللى قعدو يلموهم النهاردة

يعنى بالملاين والدولارات ..... اللهم لا حسد يعنى

بس برضو عشان اخواتهم المصريين الغلابه اللى كانو بيدعولهم دول

ولا ايييييييييييييييه

ويجعلو عامر

مبروووووووك

2008-02-08T02:04:00.000+03:00

عملوها الرجالة

عملوها الوحوش

يا ريتنى كونت معااااااااااهم

ههههههههههه

مبروووووك ... مبروووووك ... مبروووووك

يا مصر

مبروك يا كل المصرين

هقول مبروك من دلوقتى من غير ما استنى ماتش النهائى

مع أنى مليش فى الكووووورة خااااااالص

بس النجاح طعمو حلو أوى يا نااااااااااااس

وأحنا كلنا محتاجين نفرح ونحس بنجاح ولو لحظة

كان نفسى أكون فى الشارع مع كل الأسكندرانية السهرانين المهيصين على الكورنيش مهيصه زيهم وأكتر

أو بهنى كل واحد مصرى فى شوارع مصر كلها

يلا يا مصريين أفرحو وعقبال البطولة كلها

ويارب ناجحين بقى فى كل حاجة

يااااااااااااااااااارب

الصورة دى من مدونة الصباغ .. معلش بقى بس أصلها معبرة أوى

تاج خالو أحمد الصباغ

2008-02-03T00:55:00.000+03:00

أول مرة فى حياتى يتمررلى تاج مع أن لبس التاج بالنسبالى شىء عادى بعملو كل يوم يعنى
المهم التاج دة كان من صديقى العزيز خالو أحمد الصباغ
وعلى فكرة يا أحمد أنا مليش فى السياسه يعنى لو حد بلغ عنى أنا هأقر بكل حاجة وأعترف وأقول أن أنت اللى حرمتنى من المصروف .... ومنك لله

يلا نبدأ وأمرنا لله

-------*-------*-------

هل توافق على حزف خانة الديانة من البطاقة الشخصية ؟

لا طبعا .. عشان حتى على الأقل لو حصل لسعتك حاجة وأنت ماشى فى حته محدش يعرفك فيها ومبنلكش صاحب يعرفو هيعملوا فيك إيه وهيدفنوا سعتك فين

ما رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟ هل لديك أصدقاء من المثليين ؟

شوف يا ابنى .... أحنا أصلنا بنغير المسميات فى العصر اللى أحنا عايشين فيه ... ربنا قالنا أن دول أمثال قوم لوط اللى ربنا عمل فيهم إييييييه؟؟؟

سيدنا جبريل رفع قريتهم على جناحه وطلع بيها فوووق ورماها فجعل عاليها سافلها نقوم أحنا لسه هنسأل نعترف بيهم ولا لا ... ياراجل حرام عليك
أما عن الحرية فأكيد كل واحد مسئول وحيتحاسب عن نفسو بس إذا بليتم فأستتروا .. وربنا يشفى كل مريض

وربنا يعافينا

هل تعتقد بوجود إضطهاد للمسيحين فى مصر ؟

إضطهاد إيه يا راجل بس ... أولا المصريين كلهم متضطهدين فى مصر
بس هو كل اللى حاصل إن فى ولاد حلال كتير شايفين أن مصر بخير فبيقعدو يفتعلوا مسميات زى المثليين دى
يعنى مثلا لو خناقه فى طابور العيش بين اتنين مسلمين واحد فتح راس التانى .... تبقى خناقه عادية
لكن لو كان واحد منهم مسلم والتانى مسيحى .... أخ تبقى فتنه طائفيه ويا داهيه دقى
الله يكرمكوا خلونا نركز على الأهم

من هو الشخص الذى تختارة لرئاسة مصر ؟

إممممم .... هو كان مفروض طيب تدينى أختيارات أنا متعودتش على كدة دة أنا من جيل الاختيارات
بس ع العموم أنا عاوزاة يكون شخص ملوش دعوة خالص بالسياسه يعنى خارج الوسط السياسى بتاع اليومين دول بس دارس وبيفهم فى السياسة .... ويكون محترم ونزيه وعلى خلق بس مخربش عشان برضو يعرف يتعامل مع اللى مش مظبوطين .... ويكون كمان دارس شريعه إسلامية
لو لاقيت من الصنف دة أبقى هاتلى أتنين وأتوصى

إذا قت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟هل توافق على مشاركة كل من : الإخوان المسلمين - الأقباط فى الحكم ؟

طبعا أنا مليش فى السياسة فأنا هعين الصباغ دراعى اليمين واسيبله مهمه الأشخاص دى وكفايه عليا أنا إنى أنجح فى الأنتخابات وأفرق شربات
أما عن مشاركة الإخوان والاقباط مفيش مشكلة بس يكونو ناس عايزين المصلحه بجد دون أى أهداف أخرى

فى رأيك الشخصى .. ما هى أفضل مدونة على بلوجر قمت بزيارتها ؟

سؤال غريب جدا .... مدونتى طبعا بكل تواضع
هههههههه
لا بصراحه فى ناس كتير جدا بحب مدوناتهم وبستفيد منها كتير أوى وفى مدونات بعشقها كمان وزيارتى ليها يومية وهما عارفين كدة .... بس مش هقولكو عليها .... عامة السايد بار فى جزء من كبير من الناس دول وبيزيدو

للذكور فقط : أيهما تفضل كزوجة .. إمراءه عاملة ، أم ربة منزل ؟

على فكرة السؤال دة مهم اوى خلو بالكو منو بقى

للإناث فقط : هل توافقين على الزواج من رجل مطلق ؟

أعتقد أن السؤال ده ممكن أجاوب عليه على أعتبار أنى أنثى يعنى
والله دى حاجة ليها أبعاد كتير أوى وركائز .. إيه الكلام الكبير دة
أقولكو .... يعنى لو بحبو دة هيفرق
لو هو شخص فعلا كويس ومناسب ليا برضو هيفرق
ظروف طلاقه ذات نفسها برضو هتفرق كتير
ولو عندو عيال برضو هيفرق
بس أهم حاجة انا وهو إيه مع بعض
وفى الاول وفى الاخر دى مسالة نصيب

اذا تزوجت وأنجبت ولدين وبنتين .. أى الأسماء تحب أن تسمى ؟

والله أنا كنت محضرة أسماء كتيرة أوى ومن وقت للتانى بغير بس أنا نفسى أسمى أسماء غريبة .... ومبحبش حكايه سمى على أسم جدة وخالته والكلام دة إلا لو أسم حلو يعنى بس ميكونش الهدف أنى بسمى على أسم فلان عشان محدش يزعل
بس من الأسماء
عبد الرحمن – سلمان – أبوبكر – أنس
روفيدة (وهقولها روفى) – ليلى (وهقولها لى لى) أو لى لى على طول اصل البنات بحبلها الأسماء المدلعه
ربنا يرزقنا بس وإن شاالله أسمى كل دول

قولو يارب

هل تعتقد أن توريث الحكم فى مصر . . سيتم فعلا أم لا ؟

والله مفيش حاجة مستبعده ولا بعيد عن ربنا.... بس لو حصل يعنى إيه المشكلة ... شالو ألضو جابو شاهين
بس أنا بفضل الموضوع ده برضو لأن أبيه جمال برضو شاب ومننا وبعدين أتربى أنو يكون فى الحكم واللى ربا خير من اللى أشترى

فى رأيك الشخصى : ماهو أفضل إنجاز لحكومة مبارك ؟ وما هو أسوأ عمل قامت به ؟

لا بصراحه بقى بابا مبارك كان له إنجازات كتير ومنقدرش ننكر
وأسمحولى أنى أقولو بابا مبارك لأن عمر رئاستة من عمرى تقريبا
بصراحه أنا معاصرتش حد من اللى قبلة بس كفايه أننا فى عصره عشنا سلام وأستقرار ولو أمنى من الناس اللى برة .... حتى لو كان دة بسياسه أعمل عبيط وياواد طنس خالص
زائد برضو فى مشاريع كتير اتعملت كويسة وفى جزء من الحرية اسمع انو مكنش موجود زمان
أما عن الأسوأ فتقريبا كرامه مصر بقت فى الأرض

ومنك لله يا صباغ

ثم لمن تمرر هذا التاج ؟

سؤال وجيه جدا جدا
قلتولى أمرر التاج لمين
أقلكو أول واحد طبعا لزمن وحتمن ولابد يكون الصباااااااااااغ

ليييييييه ..... لانى لازم أحدفه بنفس الطوبة

هو تقريبا مخلاش حد إلا لما مررهولة

بس فى لسته صغنونة فى السايد بار اهه اللى مجوبش التاج يتفضل ويجاوبة

وكمان تمرير خاص لفريق البنات عايزة إيه

ويارب مكونش كنت رغاية

ومنجلكوش فى حاجة وحشه

عتاب وأستجداء

2008-01-25T23:29:00.000+03:00

غريبة ٌ أنتى أيتها الدنيا

غريبة وغريب هو حالى معك

جئتك غريبة وقد كنتى فى عينى غريبة أنتى الأخرى .... ولازلتى

وبالرغم من جفائك لى لم أنتظر يوما أن تصالحينى

بل كنت أنا السبّاقه دوما ً بالمصالحة

أجاريكى أحيانا وأنجح .... فأسعد

ومراتٍ تقوين علىّ فأفشل .... وأحزن

ومراتٍ يأتينى الأحساس بصعوبتك وأنى لن أقوى .... فأميل إلى أن أنسحب

ولكن من بيده الأنسحاب

فذلك هو قدرنا

فلم يكن وجودى فيك ِ بخاطرى .. ولا بخاطرك .... أعلم

ولكن قدرى ان لى معك معاش ٌ إلى حين

ولكى معى أياما ً فتمضين

فعليكى صغيرتى أن تتعملى كيف السبيل إلىّ

وعليكى أيضا أن تتعملى كيف تبتسمين دوما إلى ّ كما أفعل أنا

حتى تهون الايام بيننا

وتحلى الحياه وقتها

وفى هذا ليس لك ِ حبيبتى خيار

مثلما لم يكن وجودى معكِ قرار

فهذا أنا .... وهكذا أنتى

أحبك .... فأحبينى

ماذا حدث؟

2008-01-13T00:42:00.000+03:00

دة كان عنوان مشكلة بريد الجمعه لعدد الجمعه اللى قبل بتاعت امبارح بتاريخ 4/1/2008 وكان عنوانها ماذا حدث ؟

بصراحه هى حكت مشكلتها والينك بتاعها موجود وياريت تقروها وتعرفو القصه

بس اللى شد انتباهى واللى كان شاغل تفكيرى بقالو مدة كبيرة هى التساؤلات اللى طرحتها بمشكلتها

هى الحقيقة مشكلة بيعانيها كتير من البنات واللى دايما بتتكلم عنها المدونة الجميلة غادة فى مدونه عايزة أتجوز

مش مشكلة عنوسة طبعا على قد ما هى مشكلة مش عارفة اساسها فين ولا عارفة اسميها ايه يمكن مهذلة العرسان ممكن

مواقف كتيرة زى اللى بتطرحها المدونة بتاعتها بقيت اشوفها بأختلاف شكلها وقصصها وردود الأفعال

بقيت احس ان فى حاجة غريبة جدا بين الشباب مش عارفة هى ايه بصراحه ومش عايزة أظلم حد بس حاسه ان مبقاش فى جدية كدة او ألتزام وأحيانا احترام لدخول البيت اللى بيتفضلو ويدخلوه وبقيت احس ان فى جمله على بال كل شاب

البنات على أفا مين يشيل فأدور على أحسن حاجة بقى

تانى يا جماعه بقول انا مش بتهم حد ولا بظلم حد وعارفة كمان ان دى حاجات قسم ونصيب وارتياح فى الأول وفى الأخر بس برضو ارجع اقول معقول حد يحكم على حد من مجرد كلمتين او مقابلة وقاعده

وتلاقيه يقولك دة فى شباب كتير عاوزة تتجوز ومش لاقيه وقصداهم بنات كتير عاوزة تتجوز ومش عارفة

طب ايه الحل ونعمل ايه

بالرغم من ان يعنى اليومين دول بقو بيعملو اللالى والترالالى بس برضو مش نافع

فينها خاطبة زمان

بس برضو مكنتش هتنفع

المهم يعنى هى طرحت تساؤلات كتير وكمان خيرى رد عليها بتساؤلات - خيرى دة للى ميعرفش هو خيرى رمضان اللى بيرد على البريد واللى كان بيطلع مع عمرو اديب فى القاهرة اليوم وياريت حد يقولى هو ليه مشى عشان انا بحبو اوى ومعرفش راح فين - أنتظرت الاسبوع ده يكون فى رد على كل التساؤلات دى لكن للأسف مكنش فى

أكتفى بأنو جالو ليها عروض زواج ولو هى حبت تتفضل وإللى ممكن كتير برضو يفهمو من كلامى زيو كدة

بس برضو لا أنا بس لما ملقتش ردود زى ما أتعودت منو قلت أعرضها عليكو

المهم دى كانت تساؤلاتها

مما جعلني اتوقف وأتساءل ماذا حدث لشباب مافوق الثلاثين؟ - الحقيقة عاوزة اقول مش اللى فوق التلاتين بس - لم يهابون الزواج‏,‏ لماذا يحللون الحرام ويهربون من الحلال؟ لم يفضلون الدش والعلاقات غير السوية ومواقع الجنس والشات عن الزواج؟ لماذا يدفعون اشتراكات ومبالغ نقدية لمكاتب الزواج والخاطبة ومواقع النت بهدف البحث عن زوجة ولايتزوجون؟ ان الرجال في المجتمعات الغربية المنفتحة وليست الاسلامية يتزوجون لإقامة عائلة رغم أن الطلاق هناك مكلف جدا ولكنهم لايهابون الزواج؟ وعجبت اكثر لقراءتي ان نسبة العنوسة بين الرجال في مصر اصبحت أعلي منها للفتيات‏..‏وان الفقراء الذين لايمتلكون الباءة يتزوجون بالتقسيط والسلف بهدف الاستقرار والعفة - انا معاها لان مش دايما الأمكانيات هى السبب - ‏..‏ في حين ان فئة الميسورين او من يستطيعون الباءة لايتزوجون؟

ودى كانت تساؤلاتها ومش معنى كدة انى بقول ان الشباب كلهم كدة

تانى بقول أنا مش بتهم حد أنا قلت أطرح الموضوع لثقتى فيكم ولعلى أفهم وجهات النظر وإيه اللى حاصل بالظبط

ودة كان رد خيرى وتساؤلاته

سيدتي‏..‏ علي الرغم من أني نشرت في هذه الصفحة‏,‏ رسائل عديدة لفتيات يشكين من تأخر سن الزواج‏,‏ وصعوبة العثور علي الانسان المناسب لمشاركته في تكوين أسرة‏,‏ ونظرة المجتمع الظالمة والقاسية للفتيات اللائي تجاوزن سن الثلاثين ولم يتزوجن‏,‏ وبدلا من أن يتقدم لها شاب يقاربها في العمر‏,‏ تجد أن من يتقدم لها رجل مطلق‏,‏ أو له زوجة‏,‏ ويكبرها بسنوات عديدة‏.‏ أقول لك‏:‏ علي الرغم من كل ذلك‏,‏ فإن صدق رسالتك وكشفها لوجه آخر للأزمة‏,‏ دفعني لطرح هذه القضية من جديدخاصة أن الاحصاءات والدراسات تقول ان نسبة العوانس في مصر ـ شبابا وفتيات ـ تصل الي‏10‏ ملايين‏,‏ ودائما ترجع الأسباب الي الظروف الاقتصادية والبطالة ومغالاة الفتيات في طلباتهن من مهر وشبكة وشقة علي أعلي مستوي‏.‏ ولكن رسالتك ورسائل أخريات‏,‏ تؤكد أن هذه النظرة وهذا المفهوم قديم‏,‏ وأن أسباب عدم إقبال الشباب علي الزواج أصبحت مختلفة‏,‏ عما كانت عليه‏.‏ القضية أني لا أتلقي خطابات تعبر عن هذه الأزمة من البنات فقط‏,‏ ولكني أتلقي رسائل من شباب ومن آباء‏,‏ يسألونني عن عروس أو طريق للزواج‏,‏ يعني الرغبة متوافرة لدي الطرفين ولكنهما لا يلتقيان ‏وعلي الرغم من انتشار مكاتب الزواج ومواقع النت التي تقوم بهذه المهمة‏,‏ وذيوع فكرة زواج الصالونات‏,‏ وتجاوز الشباب والفتيات عن نظرية الزواج عن حب‏,‏ فإن الأزمة مازالت قائمة وتتفاقم ليس في مصر وحدها وإنما في العالم العربي‏.‏إني أفكر معك بصوت مرتفع وليس بين يدي دراسة أو معلومات تفسر هذه الأزمة وهذا العزوف‏..‏ هل السبب في انتشار الخطيئة في مجتمعاتنا وضعف الوازع الديني‏,‏ مما يصرف الشباب ـ ولو مؤقتا ـ عن تحصين أنفسهم؟ أو اندفاع نسبة كبيرة من الشباب إلي الزواج العرفي سهل التكاليف؟هل السبب هو عمل الفتيات واستقلالهن المادي‏,‏ جعلهن يبالغن في شروطهن؟‏..‏ وقد يكون السبب هو انتشار العري في الشارع وفي التليفزيون وظهور الفتيات في صور تبدو جميلة‏,‏ تجعل الشاب ينتظر عروسا تنافس فتيات الفيديو كليب‏,‏ ويكتفي بالإشباع البصري والحسي‏,‏ فيصرف نظره عن حبس نفسه في صورة واحدة للمرأة؟هل هو تعسف الآباء‏,‏ خاصة تجاه الأولاد‏,‏ فيفرضون عليهم فتيات لا يرقن لهم‏,‏ وأيضا تجاه البنات بعدم التيسير في تجهيزات الزواج؟

يمكن لو حاولنا نجاوب على كل الأسئلة دى نوصل لحل

طبعا مش هقول يعنى ان الحل هيخلى بنات مصر كلها تتجوز بس اهه على الأقل نعرف فى ايه يمكن حاجة تتغير

وتانى تانى بقول انا مش مع حد ضد حد

يعنى مش عايزة حد يدخل يقولى ما انتو بتعملو وبتعملو وبتعملو انا عاوزة رأى الطرفين

وفى الأول وفى الاخر الجواز طبعا قسمه ونصيب

وسمعونا رأيكو بقى

واللى يعرف خيرى يوصلو سلامى وإحترامى وإعجابى الشديد

ـــــــــــــــــــــــــــــــــــــــــــــــــــــــ

يا جماعه طلب بس إللى يدخل يقول هو شايف المشكلة من وجهه نظرة ازاى والحل ايه زى ما هو بيحلم بيه

ولكم جزيل الشكر

اليوم أنتهت

2008-01-07T01:35:00.000+03:00

لطالما تسائلت لماذا دوما ً هو

لماذا ظلت تبحث دوما ً عن صورته فى كل الصور

هل لأنها وجدت فيه ما حلمت به دوماً

هل حقا ً تجسدت فيه أحلامها

أم كان هو من رسم تلك الصورة الجميلة لذلك الفارس فى حلمها

أم لأنه أول من شاغب قلبها

لماذا لم تفارق عينيه خيالها

ولطالما داعبت صورته أحلامها

لماذا مهما مر من الوقت وبالرغم من كل شىء ظلت الصورة بنفس جمالها

هل كان حلما ً أم حقيقة ً فى حياتها

أم لأنه كان الذكرى لأيام ٍ جميلة كانت تعشقها

أم كان شوقا ً وحنينا ً لـه

تسائلت ....... وتسائلت

ولكنها ....... .....اليوم أنتهت

نعم أنتهت

عندما صدقتها أحلامها بما خشيت

وها هى اليوم تضع أخر باقه زهر مودعه إياها إلى النسيان

ولم يبقى إلا تلك الصورة وتلك الذكرى

لوليد ٍ كان هو دوما ً فى قلب الأميرة

نظرية النسبية

2007-12-26T14:14:00.000+03:00

لا مش قصدى اللى بتاعت عم الحاج أينشتاين ديه

أقولكو أنا على الحكاية

أصل من كام يوم وأنا ماشية فى الشارع وإذا بيا يترامى إلى أذنى - حلوة أوى يترامى دى - جملة فى حوار كان داير بين أتنين والجملة بيقولها الراجل الأكبر سننا يعنى كبير فى السن حبة

أه يا ابنى دى حلوة اوى يعنى أحلى من شادية كدة

أيوة هى دى كانت جملتو

فضلت طول ما أنا ماشية أقول يا سبحان الله يعنى هو مفيش حد أحلى من شادية يعنى ولا يعنى الراجل دة مشفش حد حلو من ساعه ما شاف شادية ولا فى نظرة مفيش حد حلو وشادية هى أيه الجمال عندو

وأفتكرت موقف لواحد زميلنا كنا مرة بنتكلم قدامه على فاتنات السينما بتوع اليومين دول ومين فيهم أحلى من مين - هيافه يعنى - قام هو قاطع كلامنا وقالنا جملة أفحمتنا كلنا ومش قادرة انساها ابدا لحد دلوقتى مع انو شاب يعنى

عارفين بقى مين اللى جميلة بجد وملكة جمال كمان ...... ليلى فوزى

ودى كانت جملتو

ومن هنا بقى بدأت أفكر قد إيه موضوع الجمال دة نسبى جدا من حد للتانى وقد ايه ممكن حد يشوف حد معين اجمل حد فى الدنيا

وإزاى ممكن حد يشوف حد جميل اوى وحد تالت ييجى يشوف نفس الحد مش جميل خالص

وابتديت أحس بنعمه ربنا علينا فى أن الحمد لله وسبحان الله ربنا خلقلنا تباين جوانا بين كل واحد والتانى فى نظرته للجمال وإلا كانت الحلوة بس هى اللى هتتجوز والوحشه هتبور يعنى دة على أساس بقى لو كان فى موازين ثابته لموضوع الجمال دة ولو قلنا ان الجواز بيتوقف على الجمال فقط

ولونى كمان ليا احساس صغير فى الموضوع ده منبثق - منبثق برضو ايه الكلام الجامد دة بس - من نفس الكلام واللى هو اننا بنشوف الناس من خلال أحساسنا بيهم يعنى ممكن يتغير شكل الواحد بالنسبلنا قبل وبعد معرفتنا بيه مثلا

او ممكن نشوف حد احلى حد فى الدنيا بس عشان أحنا بنحبو

مع انو ممكن ميكونش جميل خالص بس مش مجاملة يعنى دة بيبقى فعلا هو دة احساسنا بيه

وممكن يتغير شكل البنى أدم فى نظرنا كل ما نعرفو اكتر حتى ممكن نشوفو بقى وحش لو حصل اننا شفنا منه ما نكره

وساعات احنا نفسنا ممكن نبص نشوف نفسنا حلوين اوى وفى ساعات تانية نبقى مش طايقين نبص فى خلقتنا مع ان اللى بيشوفنا هو احنا برضو وبنشوفنا احنا مش حد تانى

وفى جملة مرة كان قالهالى صديق وفعلا بقيت بعد كدة اخد بالى منها ولاقيت ان فعلا كان عندو حق وهى

أن الحب بيحلى

ولاقيت فعلا ان كمان الحب بيطبع جمال فى حد ذاته على الأشياء

كمان فى لمسه سحرية بحس انها بتضفى جمال على وش أى حد فى الدنيا وتعتبر سر من اسرار الجمال

اللمسه السحرية دى متمثلة فى الأبتسامه

فعلا الواحد لما بيكون مبتسم بيبقى له وجه من الجمال خاص جدا

المهم انى بحس فعلا ان الجمال والحب كمان أشياء نسبية لا تخضع لأى معايير إلا معايير إلهيه تحمل سرها بينها وبين الرحمن

والحمد لله

2007-12-22T01:36:00.000+03:00

العيد خلص

ودخلنا على موسم كلنا مرينا بيه فى وقت من الأوقات ولسه فى ناس بتمر بيه دلوقتى

موسم الأمتحانات

هتلاقى كل حد يعرف حد داخل على الموسم دة

ولأن لينا أصحاب كتير من المدونين وغير المدونين أكيد

وقرايب أو أخوات أو أى حد من الأهل أو الجيران

وكلهم يا عينى داخلين على نفس العكة دى

ولأننا عارفين أحساسنا كان أزاى فى الوقت دة

وكنا بنبقى قد ايه محتاجين لحد يدعيلنا ويشجعنا

فأنا من هنا

بقولهم كلهم أحنا معاكو بقلوبنا

وبندعيلكو من قلوبنا

وربنا يوفقكو كلكو ويكلل سعيكم بالنجاح

وبقول لأصدقائنا المدونين منهم خاصه أننا حنفتقدكو لحد ما ترجعو

وبالتوفيق إن شاء الله

عيد أضحى سعيد

2007-12-17T14:02:00.000+03:00

أصدقائى أفراد أسرتى التدوينية

كل عيد أضحى وأنتو بخير

معنى جميل اوى خلقو التدوين بينا

وحاسسنا بيه اوى صديقنا المدون الجميل خالو أحمد الصباغ

فى بوست كلام العيال البلوجرية واللى بجد بشكرو عليه اوى

معنى دافى جدا أننا أفراد لأسرة واحدة أسرة التدوين واللى بعتز بيها اوى اوى

فعلا حسيت اننا بنشاطر بعض كل حاجة حلوة كانت او مؤلمة

وكان لكل كلمه دور فى خلق بسمه او سعادة حسيتها

يارب العيد السنه ديه يكون حلو عليكو وعليا أنا كمان وعلى كل المسلمين والسنه الجاية يكون أحلى وأحلى كمان

كان لازم اعيد عليكو ومرضتش اجيلكو ايدى فاضيه وعشان انا متذوقه جامدة للأكل ودة عيد فى اكل حلو

فته ولحمه واللذى منو

بألف هنا وشفا ويارب تعجبكو

بكرة وقفه عرفه إن شاء الله ادعو جامد اوى ومتنسونيش فى دعائكو

بشكركو كلكو بجد من قلبى

كل اصدقائى اللى عندى وكل اللى عدى وسلم او مسلمشى

بحبكو كلكو

وربنا يديم علينا كل جميل

وكل عام وأنتم بخير

أرق تحياتى سهر الليالى

ذات يوم

2007-12-04T17:05:00.000+03:00

ذات يوم

وبينما كانت تجلس الأميرة

سابحه فى بحر أحلامها الجميلة

والتى ظلت ترسم أطيافها منذ أن عقل قلبها معانيها

وفى لحظة تأمل

وجدت أن أحلامها كانت يوما ً مثل موج البحر

الذى يتسارع لبلوغ الشط

وما أن ينجح فى بلوغ حافته

حتى يترك القليل

ثم يتداعى بعيدا عائدا من حيث أتى

بعيدا إلى ذلك العمق بين ثنايا البحر وما يحمل فى أحشائه

يتوه ويتوه

ويتخبط أحيانا بين صخوره

ثم يعود من جديد ليبدأ محاولاته الوصول تاره أخرى إلى ذلك الشط

وعندها

أدركت الأميرة أنها لم تعد تلك الأميرة الصغيرة

ذات الأحلام الصغيرة

بل مر بها العمر

كبرت وكبرت أحلامها معها

حتى أصبحت تخشى أحلامها

أو أن يذهب بها عالم أحلامها بما يحمل بعيدا ً عن الواقع

وتظل أسيرة حلم قد لا يتحقق

ورغم محاولاتها الفرار من أحلامها

إلا أنها مازالت تحلم

وترى
.
.
.

أنها مازالت تلك الأميرة الصغيرة

يعرض حاليا

2007-11-29T00:07:00.000+03:00

فيلم حب البنات

فيلم من الأفلام اللى بحبها اوى واللى جه متضامنا مع الحاله بتاعت البوست اللى فات اللى هى حالة حب على نفسى لكل حاجة فى الدنيا والحب بكل انواعه يعنى اللى مش مقتصر على الحبيب

الفيلم دة بيحمل باقه من احاسيس الحب المختلفه ويارب تكونو كلكو شفتوه عشان أنا هتكلم على اللى وصلنى منه على طول من غير ما أحكى الفيلم تانى يعنى

واللى مشفهوش يرجع للكتاب صفحه أأأأأ ..... قصدى يبقى يروح يتفرج عليه سواء ع الدش أو الوصله - ربنا يخليهالنا - أو يجيبو دى فى دى أو يدور عليه على النت المهم يعنى الحصه الجاية أأأأأ ..... قصدى لما تيجو تقرو يعنى تكونو شفتوه

نروح للفيلم بقى وربنا يستر ومتناموش منى فى الاخر ولا حد يكت فى النص وعلى فكرة فى هنا كل حاجة بوب كورن - فيشار يعنى للى ميعرفش - وبيبسى كان وشيكولاته جلاكسى وكل إللى تحبوه أما بالنسبه للدبليو سى فمش لازم اوى يعنى محبكتش

الفيلم بيحكى عن مشكلة 3 بنات اخوات باباهم ربالهم عقدة لانو كان بيسيب مامتهم ويروح يتجوز ولما مات سابلهم فلوس كتيييييييييييير أوى ييجى خمستبعتاشر مليون جنيه كدة بس كتب فى الوصيه انهم لازم يقعدو سنه مع بعضهم عشان يحاول يعمل اللى معرفش يعملو وهو عايش اللى هو انو يجمعهم

كل واحدة كانت جواها كلكوعه شكل وطلعتها بشكل معين

واحدة منهم كانت متعقدة ان حبيبها يسيبها فكل ما كان يقرب خوفها يتخذ الموقف العدائى بالحجج
والتانية اصلا كارهه فكرة الرجالة دى من اصلو عشان كدة كانت عاملة هى فيها راجل
والتالتة بقى كانت تايهه ما بين مجتمعين ومش عارفة تلاقى نفسها

ساعدهم فى دة دكتور نفسانى جارهم واللى بجد احيانا كتير بنبقى محتاجين لوجود حد كدة جمبنا ونكون نهمه لان الدكتور دة بدأ اهتمامه بيهم أصلا من خلال اعجابه بكل واحدة شوية

طبعا مش قصدى اننا نروح لدكتور نفسانى يعنى لان الإنسان معاه ربنا دايما ً الحمد لله

بس هو الواحد احيانا بيكون محتاج لحد يكون ثقه بيفهم ويقدر يشاور له على الحاجة اللى تعباه و يقولو هو دة اللى بيوجعك وتعمل كدة عشان تبقى كويس

ولما سألوه عن المشاكل اللى بتجيلو قام قايلهم جملة جامدة جدا

" أن كل المشاكل بتبقى ليها علاقة بالحب "

يا مش عارف يحب حبيبه أو مش عارف يخليه يحبه يا إما مش عارف يحبب اللى حواليه فيه أو مش عارف يحب اللى حواليه أو يكون بيحب نفسه بزيادة يا إما مش عارف يحب نفسه خالص

بصراحة جاب من الاخر وممكن نزود يكون بيحب حاجة بزيادة

عقدة ليلى علوى واللى كان عندها خوف من الحب لا يسيبها حبيبها فكانت كل مرة هى اللى تتحجج وتسيبو واللى كتير ممكن يعملو كدة لحماية نفسهم واعتبرت أحمد عز صديق بس لان فى الصداقه طبعا مفيش حد يسيب حد فميبقاش الجرح كبير قال يعنى مفيش جرح كبير

فكانت منو جمله جامدة جدا ردا على كلامها بانهم أصحاب وبس

أنتى كدابة أحنا عمرنا ما كنا لبعض أصحاب وبس " واو "

فى الجون يا واد لأن فعلا الحب الحقيقى مينفعش يكون إلا حب يعنى مينفعش يكون حاجة تانية

عقدة حنان ترك واللى مامتها ربتلها العقدة اصلا فبقى عندها نوع تانى من انواع الدفاع بأنها هى اللى تجرح بس متنجرحش فبقت تدب كلام زى السم - وبرضو فى ناس كتير بيعملو كدة - أو تتعامل بجفاء شوية فكانت تهرب دايما لو حست باى شعور فيه حب حتى لو تجاه اخواتها

عقدة هنا شيحه بقى واللى كانت تايهه الاول بين عالمين واحد بينادى بالانفتاح والتانى له عاداته واللى كتير ممكن يفهموها غلط وكانت مشكلتها التانية لما حبها كريم الممثل بصورة غير اللى هى حاساها ناحيته

أثرت فيا أوى لما قالت للدكتور على أن هى بتبقى محتاجة لكلام زى اللى بيقولهولها كريم وتصرفات زى اللى بيعملها معاها بس هى مش حاسة ان هى ممكن تبادلو نفس الشعور بجملتها أنها عاوزة تحس بشعور البنت اللى عندها بوى فريند

لأن كتير بيبقو محتاجين يحسو بحاجات بيحلمو بيها اوى وممكن تتاح ليهم يستحلوها اه بس مش يقدرو يبادلوها لانهم مش حاسينها واكيد دة غلط ممكن يقعوا فيه نتيجه للحاجة

وأثر فيا الدكتور مهيب ساعتها اوى لان اتولد جوة قلبه حب بيخفيه بس كان بيتنطط قدام عنيه

أثرت فيا كمان جملة

" الحب بيقوى مبيضعفش "

لأن فعلا لو مكنش الحب يدى للى بيحب قوة يبقى حاجة تانية غير انو حب لان اللى بيحب بيتولد جواه احساس بقوة ممكن ينحت بيها فى الصخر قوة دافعه لكل جميل أما لو الحب دة دمر حاجة جوا الإنسان يبقى فى خلل وميبقاش حب

ودة اللى كانت محتاجاه ليلى فى التغلب على خوفها دة ان حبيبها يقويها ويطمنها ويفضل جمبها لان كتير بيبقو محتاجين الشعور دة لان الحب مش بس كلام جميل ومشاعر لا دة كمان مواقف صح ونجاح فى التعامل واحتواء لأن الحب حياه

ودة برضو اللى حصل مع حنان لما حبيبها أثبتلها انو فعلا بيحبها بجد لأن اللى بيحب حد بيعرف ازاى يخليه يحبو

أما هنا فأتحلت مشكلتها لما لاقيت الدكتور واللى قدر يفهمها صح لأن مهم أوى التوافق والتفاهم فى الحب مش مهم هى ايه هو ايه المهم انهم يكونو مكملين بعض كل واحد فيهم عارف يتعامل مع عيوب التانى قبل مميزاته

جملة بقى قالها الدكتور واللى كان فيها حل مشاكلهم هما التلاته

" أنتو كنتو بتدورو على الأمان ولاقيتوه لما لاقيتو بعض انتو كدة مش محتاجين دكتور نفسانى "

وجمله تانية

"مينفعش تكونى ضعيفه وفى ناس حواليكى بتحبك كدة "

فعلا دى رسالة تانية من ورا الفيلم الحب مش بس هو اللى بين حبيبين لكن الحب فى كل حاجة فى الدنيا لما الانسان بيكون حواليه ناس بتحبو بجد مينفعش يكون ضعيف لان الحب بيدى أمان

الحب لازم يولد أمان واستقرار وإلا برضو ميبقاش حب

أنتو رحتو فين اوعو تكونو نمتو ويارب مكنش ملليتكو

يلا حبو حبو اوى ومتبطلوش

ابتسم فإنه الحب

2007-11-19T00:14:00.000+03:00

حبيبى

يا من لم تراه عينى بعد

ولم تبلغه حواسى

بل رسمه فى عينى حلمى وشوقى إليه

يا من لم يولد بعد الا بقلبى ووجدانى

وجسدته لى حاجتى لوجوده وحبه

أناديك وأعلم أنك هناك

وأنك يوما ً ستأتى

حاملا ً لى زهرة الحب اليانعه

وكل احاسيس الحب والشوق الدافئه

ونمضى سويا فى طريق ٍ لا ينتهى

بحب كلله شوقنا له

فما عندى لك كفيلا بأن يأتى بك

وحينها ستعلم كم احببتك وكم احبك وكم من العمر سأظل أحبك

لأن ليس لحبك عندى عمر بل فقط إنه الشوق

وسترى حينها كم أحببتنى أنت ولن تعلم كم ستحبنى بعد

لأنى أحبك أكثر

ولكنى أريدك وقتها أن تحبنى أكثر لانى سأحبك أكثر وأكثر

أحبك كثيرا وأنتظرك كثيرا فأنت فى قلبى

.....................................

الحب أجمل ما فى الوجود

فإن لم نحظى به فلنعش على أمل اللقاء

ولنبحث عنه فى كل ما حولنا ونبتسم

فبه تصفو وتبتسم لنا الحياه

........................................

أصدقاء مدونتى الأعزاء

شكرا لكم مشاركتى لحظة الصمت

وأعلمكم أنى قد وجدت الطريق

فالحمد لله

ثم الشكر لكم

أعلم أنه الهروب

2007-11-11T02:08:00.000+03:00

ألم يراود أحد من قبل ذلك الشعور

أن تهرب هناك إلى أرضيه تلك الغرفة الفارغه فارا ً من الدنيا وما فيها

فى لحظة صمت بعيدا عن كل ما قد يجول فى بالك

بعيدا عن العقل

لحظة تريد أن توقف أى تفكير يمكن أن يخطر بالبال أو أى إحساس قد يخالج نفسك

تجلس هناك كطفل لا يعرف من الدنيا سوى اللا شىء

لحظة تتمرد فيها على حالك بالصمت

تعبت فليتنى هناك

ذلك الشبح

2007-11-07T11:52:00.000+03:00

أحاول هذه الأيام الفرار من تلك الأشباح التى تحوم حولى بشدة

شبح الحزن والملل والخوف مما تحمله الأيام

فتارة أنجح وتارة تذهب محاولاتى سدى

ولكن أحاول ألا استسلم ففى قرارة نفسى إيمان عميق بأنى إذا أستسلمت ذهبت بيا الريح إلى حيث لا أدرى

ولكن لم تعد روحى تقوى على المقاومة بما يكفى فقد أنهكت كثيرا ولم أعد أقوى على أمتصاص الصدمات

ليس يأسا ً أو قنوطا ً ما عاذ الله

وإنما هى جروح الروح التى لا أعرف كيف الفرار منها أو كيف السبيل إلى مداواتها

ففى كل مرة يعتصرنى فيها الألم والخوف أمِل فيها ضعفى وحاجتى واحاول أن أثور عليهما لكن تبؤ محاولاتى بالفشل

فلم يعد هناك ما يجدى نفعا ً واعلم أن الله وحده هو من بيده الأمر كله

فلم يعد للكلام يجد حلولاً نعم هو يخفف ولكن لا يضع حداً

فمهما حاولت الأنغماس بعيدا هنا وهناك ما بين عملى واصدقائى وحياتى يظل ذلك الأحساس بأن هناك شيئا مفقوداً أو ناقصا يطاردنى ولا أعلم لماذا بهذه القوة

فلم تعد الأشياء بنفس الطعم والزهوة بل أصبحت الحياه عادة أكاد أملها

حاولت النجاه بروحى التى تكره الغم والنكد وتعشق البهجة والرومانسية وحاولت أيضاً ألا أكتب هذا ولكن غلبنى ضعفى هذه المرة فحاولت أستجداء القوة

أعلم انى أحتاج إلى تلك القوة الخفية ولكن ليس بيدى شىء

لم افقد الامل فالأمل فى الله لا ينقطع وإنما هو ذلك الشبح اللعين

رسالة حب

2007-11-04T02:13:00.000+03:00

Happy Valentine's Day

خلال الأيام القليلة الفائته غمرنى أحساس أكثر من رائع فكان مثل فرحه أو انتعاشه فى القلب فتلك الأيام كانت مليئة بمشاعر أحسست بها أنا أحبها كثيرا لأنها كانت فى منتهى الدفء لقلبى كللها قدوم هذا اليوم من أيام الحب

قليلا ما نتقابل أنا وصديقاتى فلم تترك لنا مشاغل الدنيا مساحة أكبر ولكن نحرص دائما أن نلتقى من وقت للأخر وفى أغلب الأحيان تكون فى المناسبات والحمد لله حتى الأن كانت كلها سعيدة

عمت هذه الأيام فرحة زواج صديقة منا وتحضير لزفاف الأخرى وأجتمعنا كلنا ولا أستطيع وصف تلك الأيام فأنا أستمتعت كثيرا لوجودى معهم وقربنا من بعضنا البعض ومشاركتنا فى أشياء كثيره

كما كان بجانبى فى تلك الأيام أهلى وأجتمعنا جميعا وبخاصه جدتى التى أحبها كثيرا

شملت تلك الأيام وجودى معكم هنا بمدونتى التى حقا بعثت علىَّ بشعور جميل من الصداقه والود والمشاركة بعث فيا الأمل من جديد

فى مثل هذا اليوم أكيد كنت أتمنى وجود من أتمنى بجانبى حاملا لى زهرة الحب الحمراء بما تحمل من كل احاسيس الحب الدافىء

ولكن جئت فى هذا اليوم برساله حب حاملة ٌ إياها بقلبى مستودعه لها الله لعله يوصلها لمن أحب بنعمته علينا

فأول من أبعثها إليهم

أهلى الذين غمرونى بالحب والحنان

متمنيه من الله أن يديمهم بالصحة ورضائه عليهم

صديقاتى اللاتى أحبهن كثيرا

أدام الله صداقتنا إلى الجنه

أصدقائى فى العمل ومن أيام الدراسة وكل من حولى

أسعدكم الله

أصدقاء مدونتى الغاليين

أتوجه إليكم برساله حب وشكر متمنية ٌ لكم من الله كل السعادة فقد ساعدتمونى كثيرا وأسعدتمونى فمنكم من أسدانى النصيحة والتشجيع ومنكم من نادانى بالصديقة والعزيزة والجميله وكلمات كثيرة أثرت قلبى

شكرا لكم كلماتكم الرقيقة وتعليقاتكم التى كانت حقا نعم العون وباعث الأمل بالنسبه لى

أدام الله عليَّ وعليكم نعمه الحب والسعادة والصداقة وكل جميل

عيد حب سعيد عليكم

Happy Valentine's Day

هذا الفيلم أحبه

2007-10-27T01:18:00.000+03:00

من أروع الأفلام اللى قدمتها السينما المصرية فيلم "ليلة الزفاف" واللى عن نفسى بحبه جدا جدا جدا

الفيلم أصلا بيعرض زمن من أحلى الأزمنة واللى أنا عن نفسى كان نفسى أبقى عايشه في الأيام دى وقت لما كانت الدنيا لسه بخير والناس فيها كانوا ناس كويسين وطيبين ورايقين

طول الفيلم تلاقى الشوارع فاضية ونضيفة والناس محترمه كدة وتحس أن حياتهم كانت بسيطة وهادية وجميلة أوى

بصراحه الفيلم دة لو جابوه مليون مرة مش بمل أنى أتفرج عليه لأن بتعجبنى حاجات كتيره أوى فيه من خلال قصه الفيلم واللى منها

أولا عن دور الام فى حياه بنتها واللى مكنش عاجبها أنها تتعلق بالشاب الهلفوت بتاع النوادى والهلس وبس وكان نفسها تجوزها لدكتور زى باباها ولما صادفت الدكتور دة واللى شافت فيه الصفات المناسبة اللى تتمناها لزوج بنتها فضلت تعمل كل المحاولات اللى تخلى بنتها والدكتور دة يقربو من بعض ويتجوزو وطبعا بحيها جدا وعلى رأى المثل "أخطب لبنتك ولا تخطبش لأبنك" وأهه أحسن طبعا من خاطبة زمان واللى بيحصل دلوقتى .... ما علينا

دور الدكتور (و اللى قام بيه أحمد مظهر) واللى كان دور أكتر من رائع لشاب أى بنت عاقله تتمناه فارس لأحلامها وزوج وأب لأولادها أدب وأخلاق نجاح فى حياته المهنية ودمه خفيف بس رزين وكمان محترم فى كل علاقاته وقبل كل دة بيحبها أوى وأحترامة وحبة دة طبعا بان من مواقفه معاها خلال الفيلم ومواقفه مع كل اللى حواليه فى الفيلم

أما هى (واللى قامت بدورها الفنانه الجميلة سعاد حسنى) فكانت بنت محترمة بس طايشه حبتين زى كتير من اللى فى سنها واللى بيشدها الواد اللى مقطع السمكة وديلها لكن أثر فيا أوى دورها بعد كدة من خلال المواقف اللى كانت بتحصل بينها وبين الدكتور واللى كان فيها رومانسية ناتجة عن حب محظور نشأ فى قلبها وعذابها أنها عاوزة تفصح عنه وتصحح غلطها الحب اللى نشأ على أساس من الاحترام ودة أقوى أساس لأى حب من وجهه نظرى

بصراحة الفيلم مليان أوى بأحاسيس كتير من الحب والرومانسية والأحترام بس كمان فى حاجة مهمه أوى وصلتلى منه فعلا وحسيتها وهى ان الواحد مش مفروض يركب دماغه أوى فى الوقت اللى يلاقى اللى حواليه بينصحوه بحاجة غير اللى فى دماغه يعنى هى لولا القدر اللى خلى مامتها تفرض عليها الجوازة دى كان هيبقى فاتها حاجة حلوة أوى

صحيح مش دايما بيبقى اللى حوالينا رايهم صح بس على الأقل لازم نقف وقفه مع نفسنا ونشوف رأى اللى حوالينا وخصوصا لو كان رايهم دة فى حاجة كويسة وخصوصا كمان لو دة كان رأى الأم وما ادراك ان الام تنصح بحاجة

معلش طولت عليكو بس أصل الفيلم دة مأثر فيا حبتين فقلت أفضفض معاكو شوية وانقلكو حاجات حلوة حاساها ولونى منقلتش احساسى كله بس ما علينا

وربنا يوفق الجميع

2007-10-21T12:40:00.000+03:00

رأيتك بالأمس فى أحلامى

وأنا فى حيره

تُرى هل ستكون أنت ؟؟

صرخة ألم

2007-10-16T18:06:00.000+03:00

عيني رأت مولود علي كتف أمـــــــــــه
يصرخ تهنن فيه يصرخ تضــــــــــــمه
يصرخ تقول يا بني ما تنطق كـــــــلام
ده اللي ما يتكلمش يكتر همـــــــــــــه
عجبى

!!!!

طب يا ترى لو اتكلمت حد هيسمعنى

ولو صرخت حد هيحس ألمى

ولا أكتم جوايا همى

واسيب الايام تداوى غمى

جوايا كتير بس مين يفهمنى

عايزة اتمرد بس خايفة الأيام تمنعنى

وأرجع وأقول الصبر مفتاح الفرج

بس مين غيرك يارب اشكيلو همى يصبرنى

ويداوى غمى

ويفرج كربى

ويعينى

دة الصبر على ما فى علمك مر

و الاقى جاهين يقول

يأسك و صبرك بين إيديك و انت حر
تيأس ما تيأس الحياه راح تــــــــمر
أنا دقت مندا ومندا عجبي لقيــــــت
الصبر مر و برضك اليـأس مـــــــر
عجبي
!!

عندو حق بس القدرة من عندك وحدك

يارب

رايح أجيب الديب من ديله

2007-10-14T00:59:00.000+03:00

وأنا بفرفر على النت
قابلت حاجة لفؤاد المهندس أول ما شفت فؤاد المهندس نطت فى دماغى على طول الأغنية دى
ودى طبعا من المسرحية الجميلة "أنا فين وأنتى فين" له هو وشويكار

واللى بشوف من خلالها إن الحب لا يقترن مع الخوف أبدا

المهم قمت دورت عليها وجبتها عشان أتمتع بيها وأشاركو متعتى دى
طبعا فؤاد المهندس ممثل جميل وله حاجات كتير حلوة جدا
بس دى بالذات بقى بحبها جدا جدا جدا من وأنا صغيرة
والحمد لله أنى لما كبرت عرفت أجيبها وأستمتع بيها
أصلى بحس فيها بطفولة بريئة جدا يمكن بقت قليلة الوجود فى أطفال دلوقتى
وكمان بحس بعلاقة جميلة أوى بين أب وبنتو كلها حب وحنان
أحيانا بنفتقد للمشاعر الحلوة دى وسط زحمة الدنيا
يلا أسيبكو بقى تستمتعو بيها

أو على الأقل دة اللى أنا بحس بيه
ويارب تعجبكو

عيد سعيد يا مسلمين

2007-10-09T15:11:00.000+03:00

هل هلال العيد كل عام وأنتم والمسلمين طيبين ويارب يكون الرحيم تقبل منا الصيام والقيام وصالح الأعمال كلها وأننا نكون من الفائزين ويعود علينا رمضان سنين كتير

وفى العيد لازم نفرح زى ما وصانا رسولنا الحبيب صلى الله عليه وسلم

ومتنسوش صلة الأرحام والكحك بقى والبيتى فور والعيديات ها

Send this eCard !

وبمناسبة فرحة العيد بجد بشكر كل أصدقائى إللى زارونى وإللى نورو مدونتى بكلماتهم وتعليقاتهم الرقيقة اللى بجد أسعدتنى كتير أوى الفترة اللى فاتت

بجد شكراً

وكل عام وانتو بخير

الحلم

2007-10-04T23:44:00.000+03:00

لاشك أن الحلم هو من أحلى اللحظات التى يقضيها الإنسان فى حياته حيث أنه فى معظم الاوقات يكون الحلم هو المنفذ الذى يعبر أو يجسد طموح أوأمل أو رغبه يكنها الإنسان بداخله سواء كان يسعى لتحقيقها أو لمجرد الأمنية فقط أو تجسيد للحظات أو حالة أو شخصية يحب أن يحياها الإنسان ولا يجدها فى واقعه

بعض الأحيان حينما يحدث أن يتحقق حلم ما - سواء كان نتيجة سعى وراء تحقيقه أو لا - يكون الإنسان فى أوج فرحته ليس لمجرد حصوله على الشىء ولكن لأنه حصل على ما تمناه او ما حلم به وهذه فرحه لها طعم أخر

مثلها كمثل عابر سبيل بصحراء مقفرة يكاد يموت عطشا ً ويبحث حتى عن السراب الذى يمكن أن يبعث فيه الأمل بنقطة الماء ماذا يكون شعورة أو فرحته لو حدث وأن أمطرت السماء

أو أنة وجد بئرا بعد البحث فشرب وأرتوى فى هذه اللحظة يكون فرحه ليس فقط لمجرد انه وجد ماء ليشرب وإنما لأنه حلم وتمنى قطرة الماء التى دونها كان مصيره الموت

لكن ماذا كان ليحدث لو لم يجد عابر السبيل الماء أو لم تمطر السماء أو لو كان هذا الحلم أكبر من الواقع الذى هو فيه وهو أنه فى صحراء لا زرع فيها ولا ماء

ماذا نفعل عندما نحلم بشىء ونتمناه جدا حتى يصبح هو حلم النوم واليقظة نراه بكل تفاصيله ويتملكنا فيصبح هو كل ما نتمناه

ولكن ماذا يحدث لو لم نستطع تحقيق هذا الحلم أو لو أكتشفنا أن واقعنا لا يساعدنا عليه بما يفرضه علينا وماذا لو لم نستطع الفصل بين أحلامنا وواقعنا فمن الأحلام ما يجسد رغبه حقيقيه أو طموح لدى الإنسان

لولا إيمانى بأن الأحلام هى نعمه من الله علينا حتى ننفث بها عن ما بداخلنا لتمنيت ألا يكون لها وجود ولكن حمداً لله على نعمه

ويبقى السؤال ماذا لو لم نستطع تحقيق أحلامنا وماذا لو لم نستطع التخلى عنها

أنضحى من أجلها أم نضحى بها

ونكتفى بالحلم

فى خاطرى

2007-09-19T00:32:00.000+03:00

أبحث عنك

أبحث عنك فى كل وجه وكل مكان

أراك فى أحلامى كثيرا وأشعر بقربك بحبك بأنفاسك همساتك لمساتك

تارة تكون واضحا وضوح القمر ليلة البدر وتارة أخرى يختلط عليا الأمر وأفقدك

أركض لاهثة بحثا عنك أملا فى اللقاء وأتسائل وأتسائل متى اللقاء فشوقى إليك يحرقنى ويحرق الأيام معى

وأحيانا أخشى اللقاء خوفا من ان يكون حلما وأفقدك من جديد أو أجدك وهما سرابا قد رسمتة أنا لنفسى فأتمنى ألا ألقاك أبدا ولكنى أحتاج إليك

تدفئنى أحلامى بك كثيرا حتى أنى أتمنى ألا أصحو منها أبدا وأعيش معك فى حلم ٍ لا نهاية له ولكن متى كان بيدنا أن نطيل أحلامنا ومتى دام الحلم أبدا

أبحث وأبحث كثيرا ولكنى تعبت أرهقتنى و أرهقتنى الأيام معك
ومازلت أحتاج إليك

اسكندرية وشهر سبتمبر

2007-09-12T00:52:00.000+03:00

من احلى شهور السنة شهر سبتمبر الوسط بين الصيف وبين الخريف الجو فيه من أمتع الأجواء اللى الواحد يستجم فيها شمس حلوة هوا ونسيم واحيانا لسعه النسيم الجميلة دى

تخيلو بقى كل دة وتكونو فى اسكندرية الجميلة

بحبها اوى اوى بحسها حضنى الناعم وبحبها اكتر بقى فى شهر سبتمبر

بتبقى عروسة فعلا وخصوصا بعد لما المصيفين بيراوحو بترجع هادية وناعمة ورايقة اوى

بحس أنها اسكندرية بتاعتنا

يا سلام لما تفضل ماشى بطول الكورنيش بليل ولا تستمتع فى وقت الغروب بمنظرقرص الشمس الأحمر وهو نازل بمنتهى الرقة يغطس فى ماية البحر الهادية لو جبنا احسن فنان مش هيعرف يرسم منظر بالحلاوة دى

ما شاء الله خلق بأبدع

صحيح دة احلى جو وشهر فى اسكندرية بس بالرغم من حلاوتة دايما بيجيلى معاه احساس كدة غريب اوى مش عارفة اوصفه يمكن حزن شجن غصة كدة غريبة بتبقى بتوجع بس بستحلاها

يمكن لانها كانت دايما مرتبطة بذكريات دخول المدارس اللى بفتكرة دايما لما الدنيا بتفضى والاسواق تتملى أو يمكن لأحساسى بأن الصيف خلص وأن الشتا داخل وأنا بالنسبالى الصيف حاجة حلوة اوى

بس ارجع واقول مفيش احلى من اسكندرية فى شهر سبتمبر

وشهر سبتمبر فى اسكندرية

رمضان كريم

2007-09-10T18:03:00.001+03:00

كل سنه وانتو طيبييييييييييييييييييييييييييييييين

ورمضانكو صايميييييييييييييييييييييييييييين

ومصليين وقائمين ومزكيييييييييييييييييييين

ودعواتكو متقبلييييييييييييييييييييييييييييييين

كل عام وانتو وانا وامة المسلمين كلهم طيبين

رمضان كريم ومتنسونيش فى دعاكو والمسلمين

بحب أتنين سوا

2007-09-10T16:17:00.000+03:00

يا هنايا فى حبهم الميا و والهوا

أغنية للجميلة ليلى مراد غنيتها على أجمل شواطىء الدنيا مطروح

الله عليكى يا مطروح وعلى بحرك اللى مفيش زية بجد

كنت بروحها من زمان اوى من وانا صغيرة ومكناش بنطلع من المية الا قبل الغروب بشوية أينعم كنا بنتفحم بس كله يهون لجل ما نتمتع بالجمال

ولا يا سلام بقى لما كنا نركب الكاريتة أم حمار وعجل خشب ولا لما كنا نركب العجل ولا الجاموس اللى كان بيبقى ماشى حوالينا فى الشوارع

صحيح مطروح اتغيرت كتير اليومين دول وبقت اجمل كمان من الاول شوارعها وشواطئها وبحرها اللى عمرة ما يعلى عليه وبقى فيها متع الدنيا الحديثة زى البنانا بوت والجيت سكى بس وعلى الرغم من التقدم إلا إنى افتقدت فيها الكاريتة ام حمار وعجل خشب دى اللى كانت تهبد فينا واحنا ماشين ع الطوب

حتى سوقها معرفش فيه ايه تحس انك لما تدخلة عايز تشترى كل اللى فيه سيحان الله

اكيد دى من نعم ربنا عليها

حقيقى كانت رحلة حلوة اوى وانبسط فيها اوى

وبقول وبدعو كل الناس انهم يروحو يتمتعو بالجمال وخصوصا شهر سبتمبر صحيح داخل بعد كدة رمضان بس سبتمبر احلى شهر فى الصيف وابقو ادعولى

16 أغسطس

2007-08-17T01:54:00.000+03:00

اليوم دة يوم ميلادى كل سنه وانا طيبة

اليوم دة بحبة جدا جدا اولا لانه فى حد ذاته بارقامة حلو اوى 16 و 8 ضعف بعض نغم يعنى

وانه كمان فى الصيف

وثانيا لانو بجد اليوم دة حبايبى بيفتكرونى كتير اوى وبيكلمونى وانا بفرح بيهم اوى لانى بحبهم اوى

دة غير احتفالات اهلى بيا واللى بتسعدنى اوى ببسطتها او لو مش بسيطة

بس مؤخرا اليوم دة بقى يتملى بدموعى لانى حاسة انى ناقصنى حاجة وكل سنة اتمنى ان السنة الجاية تكون معايا الحاجة دى وتكون سنة احلى من اللى قبلها

ربنا يرزقنى اللى بتمناه وكل مسلم والحمد لله على كل حاجة رزقنى بيها

ويفضل املى ان ان شاء الله السنة الجاية احلى ويكون معايا الحاجة اللى ناقصانى

يارب

حاله

2007-01-18T01:57:00.000+03:00

لم أعد أدرى أين أنا فكلما رسوت على بر وجدتة سرابا

أتهت أنا فى البحر أم تاه عنى البر وغاب

تعلم أنه لو كان بيدى ما وطأت فيك قدما

ولكن متى كان للقدر أختيارا

فألا هدأت يا بحرى حتى أجد لبرى شطئانا

من أين يأتى الحب

2007-01-12T01:47:00.000+03:00

من كام يوم قبل الكام يوم بتوع البوست اللى فات كنت برضو قاعدة بتفرج على فيلم بس المرة دى فيلم هندى على فكرة الهنود دول حلوين اوى بيقدرو يقدمو الرومانسية التراجيدية اللى تخلى الواحد خلاص يعينى هيدخل يعيط مع الأبطال

المهم الفيلم كان رومانسى جدا عن واحد بيحب مراتة جدا جدا وهى كمان كانت بتحبة جدا جدا ومش هقولوكو على المفاجأت اللى كان بيعملها المهمأنة حب حاجة كدة اللى الواحد يتمناها بس لما ييجى يتكلم عليها قدام حد لازم الحد دة يقولو

" ماهو لازم مش فيلم الحاجات دى مش موجودة إلا فى الافلام يا ماما "

ياى على كم الأحباط اللى بيجى للواحد ساعتها ما علينا المهم بقى أن البطلة ماتت فى الفيلم طبعا انا كنت متأثرة جدا بس هى بقى قبل ما تموت كانت موصية انها حتتبرع بقلبها لمريضة عندها ومن هنا بدأت قصة تانية خالص خلتنى كالعادة اشت بتفكيرى وأفكر لأن اللى حصل أن البنت اللى أتنقلها القلب دة وبعد ما الصدفة خليتها تتعرف على جوز اللى ماتت - اللى كان وقتها زعلان اوى على مراتة يا حرام - فلاقيت نفسها بتحبه تمام زى ما كانت بتحبة الأولانية

المهم وسيبونا من اللى حصل بعد كدة دلوقتى المهم انهم عايزين يقولو أن لما هى اتنقلها القلب حبت كل اللى كانت التانية بتحبة وهنا بقى ييجى السؤال هو احنا لما بنحب بنحب منيييين؟

يترى الحب دة بيبقى من القلب ولا من المخ ولا من تفاعل الاتنين سوا

ويا ترى لما الإنسان بيحب بيفضل الحب دة مخزون جوة قلبة ولو مخ تانى هو اللى شغل القلب دة يقوم القلب مأثر فى المخ بمخزون الحب اللى عنده

بصراحة مش عارفة انا كنت فاكرة ان المخ هو اللى بيرسل الإشارات للقلب فيدق ف طبعا احنا مبنحسش إلا بدقة القلب بس رجعت فكرت أن الإنسان احيانا ممكن يقف دماغة بس قلبة يفضل شغال إللى هو الموت الإكلينيكى يعنى معنى كدة مش المخ هو بس اللى ممكن يشغل القلب

وكمان احنا عارفين أن قلوبنا بين أصبعين من أصابع الرحمن "اللهم ثبت قلوبنا على حبك ودينك"م

ويبقى السؤال من أين يأتى الحب فعلا هل من القلب وحدة أم من العقل أم من كلاهما معا.....؟