من احلى شهور السنة شهر سبتمبر الوسط بين الصيف وبين الخريف الجو فيه من أمتع الأجواء اللى الواحد يستجم فيها شمس حلوة هوا ونسيم واحيانا لسعه النسيم الجميلة دى
تخيلو بقى كل دة وتكونو فى اسكندرية الجميلة
بحبها اوى اوى بحسها حضنى الناعم وبحبها اكتر بقى فى شهر سبتمبر
بتبقى عروسة فعلا وخصوصا بعد لما المصيفين بيراوحو بترجع هادية وناعمة ورايقة اوى
بحس أنها اسكندرية بتاعتنا
يا سلام لما تفضل ماشى بطول الكورنيش بليل ولا تستمتع فى وقت الغروب بمنظرقرص الشمس الأحمر وهو نازل بمنتهى الرقة يغطس فى ماية البحر الهادية لو جبنا احسن فنان مش هيعرف يرسم منظر بالحلاوة دى
ما شاء الله خلق بأبدع
صحيح دة احلى جو وشهر فى اسكندرية بس بالرغم من حلاوتة دايما بيجيلى معاه احساس كدة غريب اوى مش عارفة اوصفه يمكن حزن شجن غصة كدة غريبة بتبقى بتوجع بس بستحلاها
يمكن لانها كانت دايما مرتبطة بذكريات دخول المدارس اللى بفتكرة دايما لما الدنيا بتفضى والاسواق تتملى أو يمكن لأحساسى بأن الصيف خلص وأن الشتا داخل وأنا بالنسبالى الصيف حاجة حلوة اوى
بس ارجع واقول مفيش احلى من اسكندرية فى شهر سبتمبر
وشهر سبتمبر فى اسكندرية
2 comments:
سيدي يا سيدي على الروقان
طالما قلتي اسكندريه يبقى بتتكلمي صح
بتصرف من كلام اخونا مرسي الظناطي
ههههههههههههههه
ايا ما كان الكلام
فما بالك بقى ان سبتمبر مع اسكندريه
فدي المتعه
اما منتهى المتعه في يناير والبرد والمطر وانتي بتتمشي على البحر
اه يا جمال اسكندريه
اسكندرانى أوى
اولا منور
اما بقى عن كلامى فدة لابد ولزمن وحتما يكون اسكندرية لانها حبيبتى الجميلة
وعندك حق فى حكاية اتمشى على البحر فى يناير وفى عز المطرة بس يمكن انا مش بحب الزروتة اوى عشان كدة سبتمبر بيظبطنى
تحياتى ليك
Post a Comment