CLICK HERE FOR BLOGGER TEMPLATES AND MYSPACE LAYOUTS »

Monday, May 19, 2008

Missing

.
الصورة دى أخدتها للبحر عندنا فى اسكندرية من كام يوم فاتو

رائعة من روائع إبداع ربنا فى خلقه سبحانه أذهلتنى كالعادة

الصورة دى كانت تقريبا فى وقت الساعه ستة كدة يعنى مش مغرب ولا حاجة

لكن السما سبحان الله كانت مضلمة أوى لكن الشمس طالعه بنور عجيب مش متسللة لكن واضحة أوى فى نص البحر منورة صفحه المية اللى كانت شبه ناعمه إلا من حبة ريح مخروشين فى نعومتها شوية

المنظر بصراحه أذهلنى وأستفزنى أنى أقف وأصورة وكنت محتارة أصورة أزاى ومنين عشان أقدر أرسم فيه كل اللى أنا شايفاه وواصلنى فى لحظتها بس الحمد لله ربنا وفقنى وإلى حد كبير الصورة أعتقد طلعت كويسة وأرضتنى

الغريب إنى معرفش ليه حسيت أنو مشهد بيعبر عن حالتى شوية
.
ضوء مفروض يكون مضوى وساطع لكنو مش طالع أوى يمكن طالع حبة أو بيحاول يطلع بس طالع شكلو غريب بس هو عايز يطلع

فى سما مش عايزة أقول مضلمة لكن مغيمة حبة

بس البحر هادى جدا وبالعكس شكلو حلو كمان

مش عارفة أقول ايه

سامحونى إذا كنت غايبة ومقصرة معاكو ومع مدونتى بس يمكن مش متظبطة شوية وعندى حاله غريبة حبتين معرفش ليه
كأنها حاجة بعدانى عن أنى أكون هنا

تايهه يمكن وبدور على نفسى أو بدور على حاجة تريحنى بجد مش عارفة هى إيه أصلا

مفروض أكون مبسوطة كتير وعندى حماس خصوصا بعد الحاجات الحلوة اللى مرت دى لكن مش حصل

معرفش ممكن أوصل لفين وإزاى وأمتى

لكن كل اللى أقدر أقولو أن أنا بشكل عام كويسة الحمد لله بس دى كلها حاجات داخلية بس مأثرة عليا حبتين تلاتة كدة

أدعولى ربنا يهدينى ويهدينى للخير

وبجد بشكر كل حد زارنى ولسه بيزورنى وبعتذرلكو كتير أوى لأنى بحبكو كلكو أوى ووحشتونى جدا و وحشنى وجودى معاكو ومع مدونتى

Friday, May 9, 2008

أخبار خفيفة


من تانى نروح على الإذاعه ونسمع كلام المدونين
زارونى أسرة البرنامج الإذاعى أنت تسأل والكمبيوتر يجيب مرة تانية وقالولى أن مدونتى ومدونة البنات عايزة ايه هيكونو ضيوف حلقات فى الأسبوع ده
والنهاردة الخميس 8 مايو كان ميعاد إذاعه الحلقة عن مدونة
البنات عايزة ايه واللى ممكن تسمعو تسجيلها دلوقتى حالاً بالاً أهو من اللينك دة بعد ما تحملوه طبعا
http://rapidshare.com/files/113552341/Record000.amr.html

والحلقة كانت تحديدا عن بوست " لا تقل أحبك فحسب " وكانت جميلة وبشكر أسرة البرنامج على صياغه الحلقات بالشكل الجميل دة وبقول لصديقاتى البنات مبروك يا بنات ويارب دايما متجمعين ع الخير إن شاء الله .

إن شاء الله يوم السبت اللى جاى 10 مايو يعنى هيكون ميعاد إذاعه الحلقة عن البوست اللى فات فى مدونتى سهر الليالى واللى كان بعنوان
تخاريف تكنولوجيه أيوة اللى تحت دة على طول أهو
أتمنى لو حد سمعو يقولى رأيو ويشاركنى الحاجات اللى بحس أنها حلوة فى حياتى دى وإن شاء الله أنا هبقى أجيب التسجيل برضو للى يحب يسمع

فى حاجة تانية كمان أسرة البرنامج عملو مدونة لإبداء أرائكم فى كل اللى بيختاروة من مدوناتكم واللى بيذيعوها عندهم على إذاعه مصر الرئيسية وعاوزين يسمعو أقتراحاتكم وتعليقاتكم كلها كلها ودة اللينك بتاع المدونة
http://netonradio.blogspot.com/

واللى عايز يعرف التفاصيل أزاى يعرف يسمع البرنامح والموجه وكدة هتلاقو كل دة فى تعليقهم على البوست اللى فات برضو
وبالتوفيق لكل المدونين كلهم كلهم
يلا أنا هعمل
Esc
بقى واخدين بالكو أصلها وقعت منى فى البوست اللى فات
ههههههههههههه

Friday, May 2, 2008

تخاريف تكنولوجية

.

الحقيقة من كتر ما الواحد بقى يقعد كتير قدام شاشه الأختراع الفظيع المدعو كمبيوتر
والعالم الأفتراضى اللى بيعيشنا فيه
ودنيا التدوين اللى بقيت عايمة فيها وبقت كل حاجة تطق فى دماغى بدل ما تتخنق جوايا زى زمان أو يقولو عليا طائة بقت تطلع فضفضه مع مدونتى ومعاكو
يعنى تقريبا أتاح الفرصة أن دماغى تضرب على الأخر أكتر ما هى

حاجتين فى الدنيا دى بيخلونى عايشة ولا أليس فى بلاد العجايب
أحلامى سواء وأنا نايمه أو أحلامى وأنا صاحية واللى بتتمثل فى سرحاااااااان فظيع
والحاجة التانية قعدتى على النت
المهم يعنى الخلط بين إحساس الحلم اللى على طول عايشة بيه والقاعده المطولة اللى بقعدها على الأختراع دة وفكرة أن أى حاجة محتاجها ممكن تدور عليها وتجيبها على النت بكل سهولة كل دة ولد ضربان جامد فى الدماغ قلب بأنى بقيت أحس
أن فى حاجات بعملها على الكمبيوتر ببقى على وشك إنى أعملها فى الواقع لولا إنى بفوق فى اللحظة المناسبة لأدرك وقتها أنه يا سلااااااااااااام لو كانت موجودة فى الواقع كانت حلتلى مشاكل كتيره أوى

يعنى لو مثلا كان فى
Copy / Ctrl C – Paste / Ctrl V
يااااااااه كانت هتفرق معايا أوى لأن أوقات مثلا ينطلب منى أكتب حاجات من ورقة أو أنا أصلا ساعات بكتب اللى بيجى فى بالى فى ورقة قبل ما أنزلة بوست مش كانت هتفرق برضو وبمناسبة الكتابة كنت اتمنى لو كل كتاباتى على الكمبيوتر لأن فى الأصل خطى وحش وساعات مبعرفش أقراه بس هنقول إيه أصل العباقرة كلهم كدة

فى حاجة برضو ببقى على وشك أنى أعملها لكن بفوق فى اللحظة المناسبة واللى هى أنى باخد كوبى من على الكمبيوتر بتاعى مثلا وأبقى عايزة أروح بالماوس على كمبيوتر حد تانى فى الشغل مثلا أعملو بيست

أو لو مثلا حد حكالى حاجه وأنا عاوزة أحكيها لحد – مش فتنة يعنى لا حكاية عادية – أخد من الكلام كوبى وأروح أعملو بيست فى ودن اللى عاوزة أحكيلو على طول بدل الرغى الكتير

Ctrl F
دى بالذات بقى ببقى هموت وأستخدمها ... لانى بصادف أوقات كتير ببقى بدور على حاجة مهمه فى الأوضه عندى ومش لاقياها أو ورقة مهمه فى مكتبى ومش لاقياها ... ولا يا سلام مثلا لو كل حاجة كانت ينفع نرنلها لما نكون بندور عليها زى الموبايل كدة مثلا
ولا بقى فى اختراع نفسى يخترعوه – واللى ناتج عن كسل رهيييييييييب – يعنى لما بفتح دولاب الهدوم عندى بيبقى اوقات نفسى يكون فى زراير فى الجمب أدوس على زرار الحاجة اللى أنا عاوزاها يقوم مطلعهالى
أو زرار تانى بقايمة الهدوم وهيستورى لكل حاجة لبستها أمتى وكام مرة وأقتراحات بممكن البس إيه النهاردة مثلا كانت وفرت عليا حيرة كل يوم الصبح واللى بكون أصلا مش شايفة قدامى


Ctrl Z
أهه دى بقى حكاية لوحدها وهى اللى خلتنى أفكر أجمع الأحاسيس بتاعت البوست دة كلو
كتير أوى بيبقى نفسى أعمل أن دو لحاجات بعلمها زى ما مثلا أقول كلمة وأحس إنها مش فى محلها أكيد كانت ممكن توفر كتير من أعتذارات وكانت ممكن تحافظ على حاجات كتير فى حياتنا مهمه
أوقات فى حاجات مثلا بتضيع مننا بدوسه بسيطة على زرار وفى حاجات بنتمنى لو كنا نرجع ثانية زمن كانت تفرق كتير أوى

Invisible
حاجة بيبقى نفسى أعملها كتير أوى وخصوصا لما بكون مزنوقه ومحطوطة فى موقف وحييييييييييييييش

Restart
يااااااااااااااه لو كان فى ايدينا نعمل ريستارت لحاجات كتير يمكن كنا قدرنا نحافظ على كل حاجة جميلة لأن تقريبا فى أكتر الأوقات البدايات بتكون أجمل كتير من أى حاجة تانية بعدين
يا سلام لو كنا نقدر نعمل ريستارت لحياتنا كلها من الأول ونعيد ترتيب كل حاجة فيها نصحح كل اللى شفنا إننا غلطنا فيه ونتلاشى أخطائنا ونعتذر للناس اللى غلطنا فى حقهم ونقضى وقت أطول مع الناس اللى محسيناش بغلاوتهم وحلاوة الوقت معاهم إلا لما فارقونا .... ياااااااااااه يمكن كانت الدنيا بقى ليها طعم تانى

إيه المود اللى دخلنا فيه ده
أهو أحنا بقى دلوقتى محتاجين نعمل واحدة
Stop
ونديها واحدة
Refresh
عشان نرجع لأليس فى بلاد العجايب من تانى

تفتكرو التخاريف دى ناتجه من إيه من كسل مثلا ولا عشان التكنولوجيا اللى لخبطتلنا عقولنا
عامة والله أنا فى الزمن دة مبقتش أستبعد حاجة وكتير فكرنا فى حاجات ومكناش متخيلين إنها هتحصل فى الدنيا وحصلت أبسط مثال هو إحنا كنا نتخيل إننا كنا ممكن نكلم حد فى أى حته فى الدنيا فى حاجة صغيرة كدة من غير سلك أسمها موبايل وكمان ممكن نشوفو مثلا
يلا وما خفى كان أعظم واللى يعيش ياما يشوف
.