.
الصورة دى أخدتها للبحر عندنا فى اسكندرية من كام يوم فاتو
رائعة من روائع إبداع ربنا فى خلقه سبحانه أذهلتنى كالعادة
الصورة دى كانت تقريبا فى وقت الساعه ستة كدة يعنى مش مغرب ولا حاجة
لكن السما سبحان الله كانت مضلمة أوى لكن الشمس طالعه بنور عجيب مش متسللة لكن واضحة أوى فى نص البحر منورة صفحه المية اللى كانت شبه ناعمه إلا من حبة ريح مخروشين فى نعومتها شوية
المنظر بصراحه أذهلنى وأستفزنى أنى أقف وأصورة وكنت محتارة أصورة أزاى ومنين عشان أقدر أرسم فيه كل اللى أنا شايفاه وواصلنى فى لحظتها بس الحمد لله ربنا وفقنى وإلى حد كبير الصورة أعتقد طلعت كويسة وأرضتنى
الغريب إنى معرفش ليه حسيت أنو مشهد بيعبر عن حالتى شوية
.
ضوء مفروض يكون مضوى وساطع لكنو مش طالع أوى يمكن طالع حبة أو بيحاول يطلع بس طالع شكلو غريب بس هو عايز يطلع
ضوء مفروض يكون مضوى وساطع لكنو مش طالع أوى يمكن طالع حبة أو بيحاول يطلع بس طالع شكلو غريب بس هو عايز يطلع
فى سما مش عايزة أقول مضلمة لكن مغيمة حبة
بس البحر هادى جدا وبالعكس شكلو حلو كمان
مش عارفة أقول ايه
سامحونى إذا كنت غايبة ومقصرة معاكو ومع مدونتى بس يمكن مش متظبطة شوية وعندى حاله غريبة حبتين معرفش ليه
كأنها حاجة بعدانى عن أنى أكون هنا
تايهه يمكن وبدور على نفسى أو بدور على حاجة تريحنى بجد مش عارفة هى إيه أصلا
مفروض أكون مبسوطة كتير وعندى حماس خصوصا بعد الحاجات الحلوة اللى مرت دى لكن مش حصل
معرفش ممكن أوصل لفين وإزاى وأمتى
لكن كل اللى أقدر أقولو أن أنا بشكل عام كويسة الحمد لله بس دى كلها حاجات داخلية بس مأثرة عليا حبتين تلاتة كدة
أدعولى ربنا يهدينى ويهدينى للخير
وبجد بشكر كل حد زارنى ولسه بيزورنى وبعتذرلكو كتير أوى لأنى بحبكو كلكو أوى ووحشتونى جدا و وحشنى وجودى معاكو ومع مدونتى
25 comments:
سهر الليالي صديقتى الشقيه
وحشاااااانى جدا
والمكسرات مفتقداكي جدا
انت عارف في مقوله حضرت في زهنى لما قريت البوست بتاعك
بتقول
لم يكن عندي حذاء ، وكنت دائم الشكوى والتذمر .. حتى قابلت رجلا بلا قدمين
انت عارفه يا سهر
في نهار وفي ليل في برد وفي حر
في حلو في وحش
مش يمكن لو مفيش لحظات مغيمه مكناش نحس بالحظات الصافيه او العكس
بس صدقينى كل حاجه في حياتنا سواء حلوه او وحشه ليه فتره وتنتهي
اتمنى ربنا يرح بالك
تبقى بخير وترجعى تنورينا تاني
دمتى بكل ود سعاده
صديقك سيد سعد
صاحب المكسرات
صورة حكاية ياسهر الليالى
فعلا من يومين الشمس كانت غايبه من كتر السحب عندنا احنا كمان
صورة جميلة ووصفك ليها اجمل
مستنى اقتراحك على البوست الجديد
وادعوكى لوضع لوجو حملة وقف تصدير الغاز الى اسرائيل
ودة اللينك بتاعه
http://www.zshare.net/image/12105759293805bb/
ربنا يوفقك لكل خير و ييسر ليكي امرك
صورة جمييييييييلة
اتمنى ان ازور اسكندرية قريب لاني من عشاقها
اوروفوار
عزيزتى
الصورة جميلة
بس لو الاضاءة زيادة شويه كانت هتكون اجمل بالنسبالى
لانى بحب لو البحر والسما
والصورة مفهاش اى ازرق خالص
وكمان قرص الشمس مش كامل وكماله بيدى جمال للصورة
اما احساسك بانه بيعبر عنك
فالصورة بقه لو حسبنها بالطريقة دى
هتكون معبرة جداا
وساعات حاجات بتحجب الضوء عنا
وبرضوا الحاجات دى بتمنع الضوء والاحساس اللى خارج منا يوصل لحد
والغيمة احسن من الضلمة
على الاقل هتعرفى تمشى فيها وتوصلى لشئ
ودورى على نفسك وحولى تلاقيها وتفهميها
ومتستعجليش مش سهل الواحد يلاقى نفسه ويفهمها ويتفاهم معاها
تحياتى
سلام
رائعة كتاباتك وسهولة الفاظك خيالك جميلك وحلمك بسيط اتمنى لكى التوفيق
سهر .. معقول ؟ قبل المغرب ؟
زى مايكون بالليل .. والشمش زى ماتكون قمر ..
بديعة جدااا
الصورة جميلة جدا
ربنا يبارك لك في موهبتك الرقيقة دي وتعرفي تتحفينا بشوية صور رائعة زي
اول ما شفتها قلت دي تصوير محترفين بجد
تسلم الآيادي
انتى يا بنتى لازم تقليقينا على حضرتك وحشتينا خالص على فكرة انا من الناس اللى بتموت فى البحر
والمنظر ده فعلا روعه
قوى تسلم ايديكى يا قمر
اسكندرية جميلة في اي وقت
شكرا علي الصورة الجميلة وربنا يهديكي للصواب والخير دايما تحياتي
الصورة جميلة اوى...
الاسكندرية كلها رائعة...
عارفة انا كنت مصور حبة صور كدة لاسكندرية زمان....
يعنى بس مش للبحر بس..ربنا يسهل وانزلها تحياتى
ربنا يهديكى يارب للخير
وربنا يعينك ويوفقك يارب امين
الصورة جميلة اوى
تحياتى
تعرفي يا اميرة
المنظر ده حسسني بالغربه قوي
بجد لولا اني شوفتوا وانا في الشغل كان ممكن حصل حاجات مش كويسه
الله يسامحك بقي
:(
بس ايه ده ايه ده
مالك بقي وفي ايه؟
يا بنتي احمدي ربنا ده كفايه ان انتي في اسكندرية
اسكندرييييييييييييييية
الناس هتفتري ولا ايه يا جدعان
:)
روقي كده وظجططي
ياللا عايزين نشوف بوست قريب ان شاء الله من اللي متعودين عليهم
مستنيين
السلام عليكم
الصورة روعه ورعه ورعه
ربنا يكرمك يارب
الصورة جميلة وساحرة
وربنا يهديكى ويصلحلك الاحوال
وفعلا مفتقدينك كتير
تحياتى
خالد
ربنا يهديكى الى ما فيه الخير لكى فى الدنيا والاخره
حلوه قوى الصوره ووصفك للمنظر ومشاعرك
والله عندك حق فعلا البحر شكلها رائع
والحمد لله انك بخير
ربنا يكرمك ويعزك
تحياتي
انا مش عارف بصراحة اية اللي مشقلب حالك كدة
بس انا جيت اطمن عليكي
بصراحه عندك حق
الصورة تجنن انا سيفتها عندي علي الكومبيوتر
بجد فنانه
ومدونتك جميله
:(
سلام
السلام عليكم ورحمه الله وبركاته
آختى الكريمة
لما أراك لم تشاركي معنا في حملتك إلى الآن ؟
أختى الكريمة : هي حملتك هي لغتك ولغتي أذا لم نحافظ عليها نحن ونعمل على نشرها فمن يفعل ذلك ؟؟
أنا لا ادعوا إلى المثالية فى استخدام اللغة والأمر مفصل بالموضوع بالمدونة
وهى ليست دعوا لفرض قيود على كيفية التعبير عن الرأي فلك مطلق الحرية في هذا
أختي الفاضلة أن مشاركتك في هذه الحملة سوف يكون احد أسباب نجاحها ونشر لغتك
ندعوا إلى الاعتزاز بلغتنا ..أعلم انك تعتز بها ولكنى أدعوك الآن إلى نشر الأمر بين كل من تعرف وكل زوار مدونتك التي تدون بها وكل المنتديات التي تشارك بها
إلا أذا كنت غير مقتنع بالفكرة والحملة فلك مطلق الحرية في هذا واعتذر أذا كنت أطالت عليك
والسلام عليكم
يــــــــــاه صورة رائعة جداً
سبحـــــــــان الله
:) :) :)
وحشتيني يا دزمة
وحشتيني بجد ربنا يعلم
والله لولا طحنتي دي
بس بامانه ربنا على بالي طول اليوم
طمنيني عليكي
وقوليلي ايه حكايه اجتماع المدونين في اسكندريه ده
أول تعليق
الحقيقة أحساسك عالي جدا
وكل تأخيرة فيها خير
وخلي بالك من نفسك
www.sebofy7alo.blogspot.com
صوره جميله تستحق أن الواحد يقف أمامها ويتامل
أما بالنسبه لحلتك فربنا يهديكي الي الخير
وانا اسف ان لي مده ما زرتش مدونتك
علشان الام
تحيتي
ممكن تقبلي دعوتي لمدونتي
يارب تعجبك هي صحيح متواضعة في نظري بس في ناس بتقولي حلوة جدا يارب تزوريها وتقولي رأيك
تحستس ومستنيكي ع المدونة هنا
http://kanyatklam.blogspot.com/
ميرو الصورة تحفة وتعبيرك عن الصورة جميل قوى .انتى عارفة انا لما شفت الصورة بكيت اسكندرية وحشتنى جدا انتى وحشتينى قوى انا اعرفك من عمر بس مكنتش اعرف انك رقيقة الاحساس كدة ربنا يهديكى ويريح بالك ويسعدك ويحقق احلامك .صحبة عمرك مروة السيد
Post a Comment