CLICK HERE FOR BLOGGER TEMPLATES AND MYSPACE LAYOUTS »

Tuesday, March 9, 2010

نداء إلى أصحاب القلوب الرحيمه



كتير بفكر وأقول لنفسى " هما ليه شركات البسكوت والعصير والحاجات الفانكى دى بيعملو فينا كدة..؟؟؟؟ "

يعنى هل يعقل أن واحدة محترمه فى طولى وفى سنى كدة راجعه من شغلها قرفانه وكل أملها ومنى عينها أنها تشترى باكو بسكوت تحلى بيه بعد الغدا تفضل طول ما هى ماشيه تفكر إزاى هتقول للراجل على البسكوت اللى هى عايزاه
أصله كان اسمه " هوبا " - اه والله هوبا - بسكوت حلو جدا ومحترم لكن ايه علاقته بأسمه متعرفش
وحبذا بقى لو الراجل اللى أنت داخل تسأل عنده مجالوش البسكوت ده قبل كدة
وكااااااان المشهد
داخله طبعا وراسمه إبتسامه بلهاء لأنى مش عارفة إزاى حسأل وخصوصا إن أوبشن إنى أدخل أدور بنفسى مش موجود
وبصوت يكاد يكون القطر دايس عليه لدرجه أن الراجل مسمعهوش أو كان بيستعبط معرفش قمت قايلاله


" لو سمحت فى بسكوت هوبا "


أرتسم على وجه الراجل أبتسامه أكتر بلاهه من اللى كنت رسماها وأكيد أعتقد إنى واحده هبله وأبتدى يسوء الهبل هو كمان وقالى


" إيه...؟ "


قمت قايلاله


" هوبا "


قالى


" لا والله مجلناش ده "


دة غير واحد تانى بصلى وقعد يضحك وقالى


" لا مفيش "

يعنى هل فى تعمد واضح وصريح من الشركات دى لإذلالنا وإجبارنا على إستخدام أسماء عجيبه مكناش ممكن نفكر نقولها ولا أصلا هما مكانوش عاملين حسابنا فى خطة مبيعاتهم على أساس إن الحاجات دى بيشتريها الأطفال بس وهما مبتفرقش معاهم إنهم يدخلو يقولو


" عمو عمو فى بسكوت هوبا "

ناهيك طبعا عن أسماء كتير أفظع من هوبا ده واللى بيكون الحل فيها


" لو سمحت عايزة من ده "


بس ده لو سمحتلك الظروف أصلا وكان حظك حلو أنك تلاقيه قدامك ومتضطرش أنك تقف ساعه قدام الراجل متنح فى الحاجات اللى عنده وفى الأخر تقولو شكرا وتسيبه وتمشى طبعا فى حالة إنك متلاقيهوش بدل ما تسأله وتعرض نفسك للمزله

تخيل بقى مشهد تانى لواحده واقفه فى البلكونة بتنادى على الراجل اللى تحت بيتهم - قبل ما يبقى فى تليفون تكلمه يحطلك الحاجة فى السبت ابو حبل ده - بتقولو والنبى يا خويا عايزة 2 "صعيدى والدلع ديدى" وواحد "قلبظ" وواحد "ايزى موزووووو" يا لهوىىىىى بس طبعا هى معذورة

زمان مكنش فى الأسماء العجيبه دى كانت كلها أسماء محترمه كدة - ولا يمكن عشان كنا أحنا عيال برضو مش عارفه - لكن برضو كان فى


" بم بم وشيبسى وكاراتيه وبست ولوكس وجيلى كولا " أسماء عاديه كلها ولما إنحرفو بقى طلع "طأطأ وهشه وتوتوس"

طبعا أنا معنديش حل أقدمه للأسماء دى أو أقتراحات ممكن أقدمها عشان تبقى الأسماء أكتر لياقه لكن
بوجه نداء إلى أصحاب القلوب الرحميه من ذوات المصانع دى
" الأطفال مش هما بس اللى بيشتروا .....دة احنا معاهم "
" وسهلوها علينا ربنا يسهلها عليكو "

7 comments:

karim said...

رائع جداا بجد و كلامك فعلا صحيح, ولكنك نسيتى ان اسماء هذة الاشياء لابد ان تكون كذلك ومتدلعة علشان هى اصلا للاطفال بالنسبة الاكبر و مهم يكون الاسم سهل وظريف علشان المنتج يتباع, استمتعت حقيقى تحياتى

Unknown said...

عندك حق والله يا سهر
امال انا اعمل ايه
بحب بسكوت شورتي
ادخل اقول للراجل عندك شورتي
يقولي محدش وقع علينا غسيل النهارده
ناهيكي طبعا عن معناها بالانجليزي الي بيسببلي حاله نفسيه مستعصية

hasona said...

تحية طيبة

عندك حق فعلا
لكن معظم الاسماء تخضع لرغبة أو فكرة صاحب هذه المؤسسات
والي ما تشير بالنسبة له

قد تكون بعيدة عن المعني الذي يجول بخاطرنا

لكن أكيد لها دلالة بالنسبة لشخص ما

ممكن حضرتك تشتري جملة أو ترسل طفل ليشتري لك

حلم بيعافر said...

هههههههههههههه

طب انت شفتى اسم واحد

امال لو دخلتى مصنع وشفتى بقية الاسماء؟

رمضان كريم

Jet said...

وليبارك الله الجميع ثم... إن.
________________
netload search

كلام على بلاطة said...

الاسماء لجذب الانتباه
تحياتى

MKSARAT - SAYED SAAD said...

ههههههههههههه
حلوة
في كمان بقلظ