سهر الليالى فى الإذاعه

بلغنى أيها الملك السعيد
ذو الرأى الرشيد
أنة وفى تعليقات البوست اللى فات
علق احد السادات
والغير معروف لدينا
بأن سهر الليالى سوف يكون لها شأن إذاعى
فى اليوم الفلانى لأنها عجباه أة يانى
فى بادىء الأمر لم تصدق البت ميرو هذا الكلام
مع أنها زارت الموقع المذكور بالإعلان
لأن برضو الموضوع كبييير يا جدعان
أنتظرت حتى ذلك اليوم
وقبل الموعد المذكور أيقظت كل المنزل
لأستقبال ما هو منتظر حلو كان او جزر
ومع أنطلاقة صوت المذيع بدأ القلق يزيد والدموع تسيل
فإذا بالخبر صحيح
وكانت المفاجأة سارة للجميع
وهنا أدرك شهرزاد الصباح فسكتت عن الكلام المباح

كان معكم الست شهرزاد فى موجز لأهم الانباء
وإليكم الخبر بالتفصيص

البوست اللى فات لاقيت كومنت من حد غير معرف بيقول ان مدونتى هتكون ضيفة لبرنامج إذاعى على إذاعه البرنامج العام الإذاعه الرئيسية لمصر الساعه تسعه وعشرة صباحا
تخيلو انتو حد بيقولكو كلام زى دة فى حاجة بتكتبها لانك مجرد بس حاسس بيها

طبعا أنا مصدقتش نفسى حتى بعد ما زرت الموقع قلت يعنى إزاى يعنى اكون ضيفة ومعقول مدونتى المتواضعه هيتكلمو عنها فى الإذاعه
المهم بسمة صديقتى فى مدونة البنات عايزة ايه قالتلى ان الكلام مكتوب هناك برضو وأن فعلا فى برنامج بيتكلم عن المدونات فى نفس الميعاد
يوم السبت اللى فات واللى كان هو المعاد المنتظر صحيت من النجمه على عكس عادتى فى الأجازات طبعا وظبط الراديو والموبايل كمان لتسجيل تلك اللحظة الجليلة
وإذا ببرنامج أسمه أنت تسأل والكمبيوتر يجيب يبدأ ويدخل المذيع الأستاذ صلاح حجازى بصوتو الجهور يتعجب من أنتشار المدونات فى شكل سؤال وإذا به يقول أنهم هياخدو الإجابة من صاحبة مدونة سهر الليالى

بتقولو مين يا ولاد؟؟ .. سهر الليالى
تبدأ موسيقى خفيفة ويظهر صوت واحدة ست وإذا بها بتقرا بوست أنا ومدونتى ويوم الحب بطريقه إلقاء زى ما انا كاتباه
مش قادرة أقولكو مقدار الفرحه اللى كنت فيها وقشعرة فى جسمى ودموع متعلقة فى عينى وانا بسمع كلام كنت كتباه على لسان حد بالطريقة دى
مش قادرة اقولكو كانت فرحتى قد ايه لما أمى سألتنى " هو بصحيح يا ميرو أنتى اللى كاتبه الكلام دة " وكانت مبسوطة وتقريبا مستغربه
مش قادرة أقولكو كان كبير اوى عندى إزاى معنى ان كلامى كان مادة لبرنامج إذاعى حتى لو لمدة عشر دقايق بس وفى ميعاد بدرى يعنى ممكن محدش كتير من المدونين يكون بيسمعو بس كون ان فى حد يحترم من الإذاعه كلف خاطرة وزار مدونتى المتواضعه ونقى منها موضوع وأستضافو بالشكل الجميل دة

دى حاجة كبيرة اوى عندى

بجد أنا مبسوطة
وحبيت أشاركو الأحساس الجميل دة
والحمد لله على كل اللى أنا فيه ده وربنا يوفقنى لما يحب ويرضى

وليكى مدونتى بقول
ميرسى على كل اللى انتى بتعمليهولى

ويارب دايما فى الخير

ولو عرفت أجيبلكو التسجيل للى يحب يسمع هجيبو

يلا بقى كفايه كدة