عيني رأت مولود علي كتف أمـــــــــــه
يصرخ تهنن فيه يصرخ تضــــــــــــمه
يصرخ تقول يا بني ما تنطق كـــــــلام
ده اللي ما يتكلمش يكتر همـــــــــــــه
عجبى
!!!!
طب يا ترى لو اتكلمت حد هيسمعنى
ولو صرخت حد هيحس ألمى
ولا أكتم جوايا همى
واسيب الايام تداوى غمى
جوايا كتير بس مين يفهمنى
عايزة اتمرد بس خايفة الأيام تمنعنى
وأرجع وأقول الصبر مفتاح الفرج
بس مين غيرك يارب اشكيلو همى يصبرنى
ويداوى غمى
ويفرج كربى
ويعينى
دة الصبر على ما فى علمك مر
و الاقى جاهين يقول
يأسك و صبرك بين إيديك و انت حر
تيأس ما تيأس الحياه راح تــــــــمر
أنا دقت مندا ومندا عجبي لقيــــــت
الصبر مر و برضك اليـأس مـــــــر
عجبي
!!
عندو حق بس القدرة من عندك وحدك
يارب
10 comments:
عجبي كلمة بقت تتقال على حاجات كتير دلوقتي يا سهر الليالي
تعرفي اية اللي يوجع اكتر في صرخة الالم ان ممكن اللي بتصرخي قدامة ما يسمعكيش يا تري يبقى الاحساس اية ساعتها
تحياتي
جميلة يا سهر اليالى
اسلوبك هو السهل الممتنع
تعبرى بمنتهى البساطة
كانك ترسمى بالاحرف
انا اجمل ما شدنى هو الاتى
طب يا ترى لو اتكلمت حد هيسمعنى
ولو صرخت حد هيحس ألمى
ولا أكتم جوايا همى
واسيب الايام تداوى غمى
جوايا كتير بس مين يفهمنى
حاولت كتير انا كمان اكتم جوايا
وما لقيتش غير الحروف والكلمات اعبر بيها عن المى
لازم نتكلم طالما بنعرف نتكلم
عارف ان الكلام تلزمه شجاعه
بس لازم لازم نتكلم
sayed saad
العزيز سيد سعد صحيح مؤلم أوى أنك تصرخ ومحدش يسمك بس كمان أصعب لما تكون صرختك جواك بتألم ومش قادر حتى تعبر عنهاساعتها بتحس انك مسجون جواك
تحياتى ونورتنى
shreen
ميرسى مرورك وتعليقك وكلماتك العذبة اللى اسعدتنى اوى
بالرغم من اى شىء الواحد لازم يتكلم اولا لربنا وبعد كدة لحد بيحبة اوى لان ساعات فى كلماتهم ربنا بيكون ميسر الدوا
تحياتى وشكرا ليكى
اسكندراني اوي
اولا بجد ومش هبطل كل مرة انى اقولك انك منورنى وان زيارتك بتسعدنى
عندك حق اننا لازم نتكلم بس كمان لازم نلاقى الحد الصح اللى نتكلم معاهلان المشكلة ان ساعات كلامنا ممكن يضايقنا اكتر
تحياتى ومنورنى
احسن حاجة انك متسرخيش
اول مرة اعرف ان ليكى فى شعر العامية وكمان بتنافسى صلاح جاهين .. جميل يا ست الكل بس ايه نبرة اليأس اللى فيه دى .. كنت بأستمد من كلماتك الامل ليه التحول الغريب ده أمال احنا نقول ايه و...عجبى
شكراً على مرورك واعجابك بالموسيقى على فكرة انا لما باحب استريح من هموم اليوم كله باسمع الموسيقى دى بالذات يمكن عشان كده جبتها فى المدونة و الحمد لله انها عجبت حد .. تحياتى يا اسكندرانية
عروس البحر
نورتى
إن شاء الله هحاول
الصديق العزيز حازم شلبى
نورت زى عادتك
على فكرة انا لا ليه فى الشعر ولا بنافس حد أنا بس بوصف احساس فى شوية كلمات زى ما بتطلع
دايما الأمل موجود ومفيش يأس لأن رحمه ربنا موجودة دايما
بس زى ما تقول دة فلفل الحياه عشان يبقى ليها طعم
وعلى فكرة انا كمان بحب الموسيقى دى أوى وتلاقينى دايما عندك بسمعها عشان هى مش عندى
تحياتى
Post a Comment