نظرية النسبية

لا مش قصدى اللى بتاعت عم الحاج أينشتاين ديه

أقولكو أنا على الحكاية

أصل من كام يوم وأنا ماشية فى الشارع وإذا بيا يترامى إلى أذنى - حلوة أوى يترامى دى - جملة فى حوار كان داير بين أتنين والجملة بيقولها الراجل الأكبر سننا يعنى كبير فى السن حبة

أه يا ابنى دى حلوة اوى يعنى أحلى من شادية كدة

أيوة هى دى كانت جملتو

فضلت طول ما أنا ماشية أقول يا سبحان الله يعنى هو مفيش حد أحلى من شادية يعنى ولا يعنى الراجل دة مشفش حد حلو من ساعه ما شاف شادية ولا فى نظرة مفيش حد حلو وشادية هى أيه الجمال عندو

وأفتكرت موقف لواحد زميلنا كنا مرة بنتكلم قدامه على فاتنات السينما بتوع اليومين دول ومين فيهم أحلى من مين - هيافه يعنى - قام هو قاطع كلامنا وقالنا جملة أفحمتنا كلنا ومش قادرة انساها ابدا لحد دلوقتى مع انو شاب يعنى

عارفين بقى مين اللى جميلة بجد وملكة جمال كمان ...... ليلى فوزى

ودى كانت جملتو

ومن هنا بقى بدأت أفكر قد إيه موضوع الجمال دة نسبى جدا من حد للتانى وقد ايه ممكن حد يشوف حد معين اجمل حد فى الدنيا

وإزاى ممكن حد يشوف حد جميل اوى وحد تالت ييجى يشوف نفس الحد مش جميل خالص

وابتديت أحس بنعمه ربنا علينا فى أن الحمد لله وسبحان الله ربنا خلقلنا تباين جوانا بين كل واحد والتانى فى نظرته للجمال وإلا كانت الحلوة بس هى اللى هتتجوز والوحشه هتبور يعنى دة على أساس بقى لو كان فى موازين ثابته لموضوع الجمال دة ولو قلنا ان الجواز بيتوقف على الجمال فقط

ولونى كمان ليا احساس صغير فى الموضوع ده منبثق - منبثق برضو ايه الكلام الجامد دة بس - من نفس الكلام واللى هو اننا بنشوف الناس من خلال أحساسنا بيهم يعنى ممكن يتغير شكل الواحد بالنسبلنا قبل وبعد معرفتنا بيه مثلا

او ممكن نشوف حد احلى حد فى الدنيا بس عشان أحنا بنحبو

مع انو ممكن ميكونش جميل خالص بس مش مجاملة يعنى دة بيبقى فعلا هو دة احساسنا بيه

وممكن يتغير شكل البنى أدم فى نظرنا كل ما نعرفو اكتر حتى ممكن نشوفو بقى وحش لو حصل اننا شفنا منه ما نكره

وساعات احنا نفسنا ممكن نبص نشوف نفسنا حلوين اوى وفى ساعات تانية نبقى مش طايقين نبص فى خلقتنا مع ان اللى بيشوفنا هو احنا برضو وبنشوفنا احنا مش حد تانى

وفى جملة مرة كان قالهالى صديق وفعلا بقيت بعد كدة اخد بالى منها ولاقيت ان فعلا كان عندو حق وهى

أن الحب بيحلى

ولاقيت فعلا ان كمان الحب بيطبع جمال فى حد ذاته على الأشياء

كمان فى لمسه سحرية بحس انها بتضفى جمال على وش أى حد فى الدنيا وتعتبر سر من اسرار الجمال

اللمسه السحرية دى متمثلة فى الأبتسامه

فعلا الواحد لما بيكون مبتسم بيبقى له وجه من الجمال خاص جدا

المهم انى بحس فعلا ان الجمال والحب كمان أشياء نسبية لا تخضع لأى معايير إلا معايير إلهيه تحمل سرها بينها وبين الرحمن

والحمد لله

العيد خلص

ودخلنا على موسم كلنا مرينا بيه فى وقت من الأوقات ولسه فى ناس بتمر بيه دلوقتى

موسم الأمتحانات

هتلاقى كل حد يعرف حد داخل على الموسم دة

ولأن لينا أصحاب كتير من المدونين وغير المدونين أكيد

وقرايب أو أخوات أو أى حد من الأهل أو الجيران

وكلهم يا عينى داخلين على نفس العكة دى

ولأننا عارفين أحساسنا كان أزاى فى الوقت دة

وكنا بنبقى قد ايه محتاجين لحد يدعيلنا ويشجعنا

فأنا من هنا

بقولهم كلهم أحنا معاكو بقلوبنا

وبندعيلكو من قلوبنا

وربنا يوفقكو كلكو ويكلل سعيكم بالنجاح

وبقول لأصدقائنا المدونين منهم خاصه أننا حنفتقدكو لحد ما ترجعو

وبالتوفيق إن شاء الله

عيد أضحى سعيد

أصدقائى أفراد أسرتى التدوينية

كل عيد أضحى وأنتو بخير

معنى جميل اوى خلقو التدوين بينا

وحاسسنا بيه اوى صديقنا المدون الجميل خالو أحمد الصباغ

فى بوست كلام العيال البلوجرية واللى بجد بشكرو عليه اوى

معنى دافى جدا أننا أفراد لأسرة واحدة أسرة التدوين واللى بعتز بيها اوى اوى

فعلا حسيت اننا بنشاطر بعض كل حاجة حلوة كانت او مؤلمة

وكان لكل كلمه دور فى خلق بسمه او سعادة حسيتها

يارب العيد السنه ديه يكون حلو عليكو وعليا أنا كمان وعلى كل المسلمين والسنه الجاية يكون أحلى وأحلى كمان

كان لازم اعيد عليكو ومرضتش اجيلكو ايدى فاضيه وعشان انا متذوقه جامدة للأكل ودة عيد فى اكل حلو

فته ولحمه واللذى منو

بألف هنا وشفا ويارب تعجبكو

.

بكرة وقفه عرفه إن شاء الله ادعو جامد اوى ومتنسونيش فى دعائكو

.

بشكركو كلكو بجد من قلبى

كل اصدقائى اللى عندى وكل اللى عدى وسلم او مسلمشى

بحبكو كلكو

وربنا يديم علينا كل جميل

.

وكل عام وأنتم بخير

..

أرق تحياتى سهر الليالى

.

ذات يوم

ذات يوم

وبينما كانت تجلس الأميرة

سابحه فى بحر أحلامها الجميلة

والتى ظلت ترسم أطيافها منذ أن عقل قلبها معانيها

وفى لحظة تأمل

وجدت أن أحلامها كانت يوما ً مثل موج البحر

الذى يتسارع لبلوغ الشط

وما أن ينجح فى بلوغ حافته

حتى يترك القليل

ثم يتداعى بعيدا عائدا من حيث أتى

بعيدا إلى ذلك العمق بين ثنايا البحر وما يحمل فى أحشائه

يتوه ويتوه

ويتخبط أحيانا بين صخوره

ثم يعود من جديد ليبدأ محاولاته الوصول تاره أخرى إلى ذلك الشط

وعندها

أدركت الأميرة أنها لم تعد تلك الأميرة الصغيرة

ذات الأحلام الصغيرة

بل مر بها العمر

كبرت وكبرت أحلامها معها

حتى أصبحت تخشى أحلامها

أو أن يذهب بها عالم أحلامها بما يحمل بعيدا ً عن الواقع

وتظل أسيرة حلم قد لا يتحقق

ورغم محاولاتها الفرار من أحلامها

إلا أنها مازالت تحلم

وترى
.
.
.

.

أنها مازالت تلك الأميرة الصغيرة

.

يعرض حاليا

فيلم حب البنات

فيلم من الأفلام اللى بحبها اوى واللى جه متضامنا مع الحاله بتاعت البوست اللى فات اللى هى حالة حب على نفسى لكل حاجة فى الدنيا والحب بكل انواعه يعنى اللى مش مقتصر على الحبيب

الفيلم دة بيحمل باقه من احاسيس الحب المختلفه ويارب تكونو كلكو شفتوه عشان أنا هتكلم على اللى وصلنى منه على طول من غير ما أحكى الفيلم تانى يعنى

واللى مشفهوش يرجع للكتاب صفحه أأأأأ ..... قصدى يبقى يروح يتفرج عليه سواء ع الدش أو الوصله - ربنا يخليهالنا - أو يجيبو دى فى دى أو يدور عليه على النت المهم يعنى الحصه الجاية أأأأأ ..... قصدى لما تيجو تقرو يعنى تكونو شفتوه

نروح للفيلم بقى وربنا يستر ومتناموش منى فى الاخر ولا حد يكت فى النص وعلى فكرة فى هنا كل حاجة بوب كورن - فيشار يعنى للى ميعرفش - وبيبسى كان وشيكولاته جلاكسى وكل إللى تحبوه أما بالنسبه للدبليو سى فمش لازم اوى يعنى محبكتش

الفيلم بيحكى عن مشكلة 3 بنات اخوات باباهم ربالهم عقدة لانو كان بيسيب مامتهم ويروح يتجوز ولما مات سابلهم فلوس كتيييييييييييير أوى ييجى خمستبعتاشر مليون جنيه كدة بس كتب فى الوصيه انهم لازم يقعدو سنه مع بعضهم عشان يحاول يعمل اللى معرفش يعملو وهو عايش اللى هو انو يجمعهم

كل واحدة كانت جواها كلكوعه شكل وطلعتها بشكل معين

واحدة منهم كانت متعقدة ان حبيبها يسيبها فكل ما كان يقرب خوفها يتخذ الموقف العدائى بالحجج
والتانية اصلا كارهه فكرة الرجالة دى من اصلو عشان كدة كانت عاملة هى فيها راجل
والتالتة بقى كانت تايهه ما بين مجتمعين ومش عارفة تلاقى نفسها

ساعدهم فى دة دكتور نفسانى جارهم واللى بجد احيانا كتير بنبقى محتاجين لوجود حد كدة جمبنا ونكون نهمه لان الدكتور دة بدأ اهتمامه بيهم أصلا من خلال اعجابه بكل واحدة شوية

طبعا مش قصدى اننا نروح لدكتور نفسانى يعنى لان الإنسان معاه ربنا دايما ً الحمد لله

بس هو الواحد احيانا بيكون محتاج لحد يكون ثقه بيفهم ويقدر يشاور له على الحاجة اللى تعباه و يقولو هو دة اللى بيوجعك وتعمل كدة عشان تبقى كويس

ولما سألوه عن المشاكل اللى بتجيلو قام قايلهم جملة جامدة جدا

" أن كل المشاكل بتبقى ليها علاقة بالحب "

يا مش عارف يحب حبيبه أو مش عارف يخليه يحبه يا إما مش عارف يحبب اللى حواليه فيه أو مش عارف يحب اللى حواليه أو يكون بيحب نفسه بزيادة يا إما مش عارف يحب نفسه خالص

بصراحة جاب من الاخر وممكن نزود يكون بيحب حاجة بزيادة

عقدة ليلى علوى واللى كان عندها خوف من الحب لا يسيبها حبيبها فكانت كل مرة هى اللى تتحجج وتسيبو واللى كتير ممكن يعملو كدة لحماية نفسهم واعتبرت أحمد عز صديق بس لان فى الصداقه طبعا مفيش حد يسيب حد فميبقاش الجرح كبير قال يعنى مفيش جرح كبير

فكانت منو جمله جامدة جدا ردا على كلامها بانهم أصحاب وبس

أنتى كدابة أحنا عمرنا ما كنا لبعض أصحاب وبس " واو "

فى الجون يا واد لأن فعلا الحب الحقيقى مينفعش يكون إلا حب يعنى مينفعش يكون حاجة تانية

عقدة حنان ترك واللى مامتها ربتلها العقدة اصلا فبقى عندها نوع تانى من انواع الدفاع بأنها هى اللى تجرح بس متنجرحش فبقت تدب كلام زى السم - وبرضو فى ناس كتير بيعملو كدة - أو تتعامل بجفاء شوية فكانت تهرب دايما لو حست باى شعور فيه حب حتى لو تجاه اخواتها

عقدة هنا شيحه بقى واللى كانت تايهه الاول بين عالمين واحد بينادى بالانفتاح والتانى له عاداته واللى كتير ممكن يفهموها غلط وكانت مشكلتها التانية لما حبها كريم الممثل بصورة غير اللى هى حاساها ناحيته

أثرت فيا أوى لما قالت للدكتور على أن هى بتبقى محتاجة لكلام زى اللى بيقولهولها كريم وتصرفات زى اللى بيعملها معاها بس هى مش حاسة ان هى ممكن تبادلو نفس الشعور بجملتها أنها عاوزة تحس بشعور البنت اللى عندها بوى فريند

لأن كتير بيبقو محتاجين يحسو بحاجات بيحلمو بيها اوى وممكن تتاح ليهم يستحلوها اه بس مش يقدرو يبادلوها لانهم مش حاسينها واكيد دة غلط ممكن يقعوا فيه نتيجه للحاجة

وأثر فيا الدكتور مهيب ساعتها اوى لان اتولد جوة قلبه حب بيخفيه بس كان بيتنطط قدام عنيه

أثرت فيا كمان جملة

" الحب بيقوى مبيضعفش "

لأن فعلا لو مكنش الحب يدى للى بيحب قوة يبقى حاجة تانية غير انو حب لان اللى بيحب بيتولد جواه احساس بقوة ممكن ينحت بيها فى الصخر قوة دافعه لكل جميل أما لو الحب دة دمر حاجة جوا الإنسان يبقى فى خلل وميبقاش حب

ودة اللى كانت محتاجاه ليلى فى التغلب على خوفها دة ان حبيبها يقويها ويطمنها ويفضل جمبها لان كتير بيبقو محتاجين الشعور دة لان الحب مش بس كلام جميل ومشاعر لا دة كمان مواقف صح ونجاح فى التعامل واحتواء لأن الحب حياه

ودة برضو اللى حصل مع حنان لما حبيبها أثبتلها انو فعلا بيحبها بجد لأن اللى بيحب حد بيعرف ازاى يخليه يحبو

أما هنا فأتحلت مشكلتها لما لاقيت الدكتور واللى قدر يفهمها صح لأن مهم أوى التوافق والتفاهم فى الحب مش مهم هى ايه هو ايه المهم انهم يكونو مكملين بعض كل واحد فيهم عارف يتعامل مع عيوب التانى قبل مميزاته

جملة بقى قالها الدكتور واللى كان فيها حل مشاكلهم هما التلاته

" أنتو كنتو بتدورو على الأمان ولاقيتوه لما لاقيتو بعض انتو كدة مش محتاجين دكتور نفسانى "

وجمله تانية

"مينفعش تكونى ضعيفه وفى ناس حواليكى بتحبك كدة "

فعلا دى رسالة تانية من ورا الفيلم الحب مش بس هو اللى بين حبيبين لكن الحب فى كل حاجة فى الدنيا لما الانسان بيكون حواليه ناس بتحبو بجد مينفعش يكون ضعيف لان الحب بيدى أمان

الحب لازم يولد أمان واستقرار وإلا برضو ميبقاش حب

أنتو رحتو فين اوعو تكونو نمتو ويارب مكنش ملليتكو

يلا حبو حبو اوى ومتبطلوش

ابتسم فإنه الحب

حبيبى

يا من لم تراه عينى بعد

ولم تبلغه حواسى

بل رسمه فى عينى حلمى وشوقى إليه

يا من لم يولد بعد الا بقلبى ووجدانى

وجسدته لى حاجتى لوجوده وحبه

أناديك وأعلم أنك هناك

وأنك يوما ً ستأتى

حاملا ً لى زهرة الحب اليانعه

وكل احاسيس الحب والشوق الدافئه

ونمضى سويا فى طريق ٍ لا ينتهى

بحب كلله شوقنا له

فما عندى لك كفيلا بأن يأتى بك

وحينها ستعلم كم احببتك وكم احبك وكم من العمر سأظل أحبك

لأن ليس لحبك عندى عمر بل فقط إنه الشوق

وسترى حينها كم أحببتنى أنت ولن تعلم كم ستحبنى بعد

لأنى أحبك أكثر

ولكنى أريدك وقتها أن تحبنى أكثر لانى سأحبك أكثر وأكثر

أحبك كثيرا وأنتظرك كثيرا فأنت فى قلبى

.....................................

الحب أجمل ما فى الوجود

فإن لم نحظى به فلنعش على أمل اللقاء

ولنبحث عنه فى كل ما حولنا ونبتسم

فبه تصفو وتبتسم لنا الحياه

........................................

أصدقاء مدونتى الأعزاء

شكرا لكم مشاركتى لحظة الصمت

وأعلمكم أنى قد وجدت الطريق

فالحمد لله

ثم الشكر لكم

أعلم أنه الهروب

ألم يراود أحد من قبل ذلك الشعور

أن تهرب هناك إلى أرضيه تلك الغرفة الفارغه فارا ً من الدنيا وما فيها

فى لحظة صمت بعيدا عن كل ما قد يجول فى بالك

بعيدا عن العقل

لحظة تريد أن توقف أى تفكير يمكن أن يخطر بالبال أو أى إحساس قد يخالج نفسك

تجلس هناك كطفل لا يعرف من الدنيا سوى اللا شىء

لحظة تتمرد فيها على حالك بالصمت

تعبت فليتنى هناك

ذلك الشبح

أحاول هذه الأيام الفرار من تلك الأشباح التى تحوم حولى بشدة

شبح الحزن والملل والخوف مما تحمله الأيام

فتارة أنجح وتارة تذهب محاولاتى سدى

ولكن أحاول ألا استسلم ففى قرارة نفسى إيمان عميق بأنى إذا أستسلمت ذهبت بيا الريح إلى حيث لا أدرى

ولكن لم تعد روحى تقوى على المقاومة بما يكفى فقد أنهكت كثيرا ولم أعد أقوى على أمتصاص الصدمات

ليس يأسا ً أو قنوطا ً ما عاذ الله

وإنما هى جروح الروح التى لا أعرف كيف الفرار منها أو كيف السبيل إلى مداواتها

ففى كل مرة يعتصرنى فيها الألم والخوف أمِل فيها ضعفى وحاجتى واحاول أن أثور عليهما لكن تبؤ محاولاتى بالفشل

فلم يعد هناك ما يجدى نفعا ً واعلم أن الله وحده هو من بيده الأمر كله

فلم يعد للكلام يجد حلولاً نعم هو يخفف ولكن لا يضع حداً

فمهما حاولت الأنغماس بعيدا هنا وهناك ما بين عملى واصدقائى وحياتى يظل ذلك الأحساس بأن هناك شيئا مفقوداً أو ناقصا يطاردنى ولا أعلم لماذا بهذه القوة

فلم تعد الأشياء بنفس الطعم والزهوة بل أصبحت الحياه عادة أكاد أملها

حاولت النجاه بروحى التى تكره الغم والنكد وتعشق البهجة والرومانسية وحاولت أيضاً ألا أكتب هذا ولكن غلبنى ضعفى هذه المرة فحاولت أستجداء القوة

أعلم انى أحتاج إلى تلك القوة الخفية ولكن ليس بيدى شىء

لم افقد الامل فالأمل فى الله لا ينقطع وإنما هو ذلك الشبح اللعين

رسالة حب

Happy Valentine's Day

خلال الأيام القليلة الفائته غمرنى أحساس أكثر من رائع فكان مثل فرحه أو انتعاشه فى القلب فتلك الأيام كانت مليئة بمشاعر أحسست بها أنا أحبها كثيرا لأنها كانت فى منتهى الدفء لقلبى كللها قدوم هذا اليوم من أيام الحب

قليلا ما نتقابل أنا وصديقاتى فلم تترك لنا مشاغل الدنيا مساحة أكبر ولكن نحرص دائما أن نلتقى من وقت للأخر وفى أغلب الأحيان تكون فى المناسبات والحمد لله حتى الأن كانت كلها سعيدة

عمت هذه الأيام فرحة زواج صديقة منا وتحضير لزفاف الأخرى وأجتمعنا كلنا ولا أستطيع وصف تلك الأيام فأنا أستمتعت كثيرا لوجودى معهم وقربنا من بعضنا البعض ومشاركتنا فى أشياء كثيره

كما كان بجانبى فى تلك الأيام أهلى وأجتمعنا جميعا وبخاصه جدتى التى أحبها كثيرا

شملت تلك الأيام وجودى معكم هنا بمدونتى التى حقا بعثت علىَّ بشعور جميل من الصداقه والود والمشاركة بعث فيا الأمل من جديد

فى مثل هذا اليوم أكيد كنت أتمنى وجود من أتمنى بجانبى حاملا لى زهرة الحب الحمراء بما تحمل من كل احاسيس الحب الدافىء

ولكن جئت فى هذا اليوم برساله حب حاملة ٌ إياها بقلبى مستودعه لها الله لعله يوصلها لمن أحب بنعمته علينا

فأول من أبعثها إليهم

أهلى الذين غمرونى بالحب والحنان

متمنيه من الله أن يديمهم بالصحة ورضائه عليهم

صديقاتى اللاتى أحبهن كثيرا

أدام الله صداقتنا إلى الجنه

أصدقائى فى العمل ومن أيام الدراسة وكل من حولى

أسعدكم الله

أصدقاء مدونتى الغاليين

أتوجه إليكم برساله حب وشكر متمنية ٌ لكم من الله كل السعادة فقد ساعدتمونى كثيرا وأسعدتمونى فمنكم من أسدانى النصيحة والتشجيع ومنكم من نادانى بالصديقة والعزيزة والجميله وكلمات كثيرة أثرت قلبى

شكرا لكم كلماتكم الرقيقة وتعليقاتكم التى كانت حقا نعم العون وباعث الأمل بالنسبه لى

أدام الله عليَّ وعليكم نعمه الحب والسعادة والصداقة وكل جميل

عيد حب سعيد عليكم

Happy Valentine's Day

هذا الفيلم أحبه

من أروع الأفلام اللى قدمتها السينما المصرية فيلم "ليلة الزفاف" واللى عن نفسى بحبه جدا جدا جدا

الفيلم أصلا بيعرض زمن من أحلى الأزمنة واللى أنا عن نفسى كان نفسى أبقى عايشه في الأيام دى وقت لما كانت الدنيا لسه بخير والناس فيها كانوا ناس كويسين وطيبين ورايقين

طول الفيلم تلاقى الشوارع فاضية ونضيفة والناس محترمه كدة وتحس أن حياتهم كانت بسيطة وهادية وجميلة أوى

بصراحه الفيلم دة لو جابوه مليون مرة مش بمل أنى أتفرج عليه لأن بتعجبنى حاجات كتيره أوى فيه من خلال قصه الفيلم واللى منها

أولا عن دور الام فى حياه بنتها واللى مكنش عاجبها أنها تتعلق بالشاب الهلفوت بتاع النوادى والهلس وبس وكان نفسها تجوزها لدكتور زى باباها ولما صادفت الدكتور دة واللى شافت فيه الصفات المناسبة اللى تتمناها لزوج بنتها فضلت تعمل كل المحاولات اللى تخلى بنتها والدكتور دة يقربو من بعض ويتجوزو وطبعا بحيها جدا وعلى رأى المثل "أخطب لبنتك ولا تخطبش لأبنك" وأهه أحسن طبعا من خاطبة زمان واللى بيحصل دلوقتى .... ما علينا

دور الدكتور (و اللى قام بيه أحمد مظهر) واللى كان دور أكتر من رائع لشاب أى بنت عاقله تتمناه فارس لأحلامها وزوج وأب لأولادها أدب وأخلاق نجاح فى حياته المهنية ودمه خفيف بس رزين وكمان محترم فى كل علاقاته وقبل كل دة بيحبها أوى وأحترامة وحبة دة طبعا بان من مواقفه معاها خلال الفيلم ومواقفه مع كل اللى حواليه فى الفيلم

أما هى (واللى قامت بدورها الفنانه الجميلة سعاد حسنى) فكانت بنت محترمة بس طايشه حبتين زى كتير من اللى فى سنها واللى بيشدها الواد اللى مقطع السمكة وديلها لكن أثر فيا أوى دورها بعد كدة من خلال المواقف اللى كانت بتحصل بينها وبين الدكتور واللى كان فيها رومانسية ناتجة عن حب محظور نشأ فى قلبها وعذابها أنها عاوزة تفصح عنه وتصحح غلطها الحب اللى نشأ على أساس من الاحترام ودة أقوى أساس لأى حب من وجهه نظرى

بصراحة الفيلم مليان أوى بأحاسيس كتير من الحب والرومانسية والأحترام بس كمان فى حاجة مهمه أوى وصلتلى منه فعلا وحسيتها وهى ان الواحد مش مفروض يركب دماغه أوى فى الوقت اللى يلاقى اللى حواليه بينصحوه بحاجة غير اللى فى دماغه يعنى هى لولا القدر اللى خلى مامتها تفرض عليها الجوازة دى كان هيبقى فاتها حاجة حلوة أوى

صحيح مش دايما بيبقى اللى حوالينا رايهم صح بس على الأقل لازم نقف وقفه مع نفسنا ونشوف رأى اللى حوالينا وخصوصا لو كان رايهم دة فى حاجة كويسة وخصوصا كمان لو دة كان رأى الأم وما ادراك ان الام تنصح بحاجة

معلش طولت عليكو بس أصل الفيلم دة مأثر فيا حبتين فقلت أفضفض معاكو شوية وانقلكو حاجات حلوة حاساها ولونى منقلتش احساسى كله بس ما علينا

وربنا يوفق الجميع